Eizawnna atana puihna pekte enfiah

Eizawnna atana puihna pekte enfiah
High Powered Committee Lunglei hmalakna, Lunglei district huamchhunga eizawnna bul tan kawnga intihsiakna ‘Leitlangpui Rahbi’ 2021- 2022 Micro Start Up Capital Competition lawmman dawngtu enterpreneur 47-te hmalakna chu Ningani khan enfiah a ni.
Lawmman dawngtute hi an sum dawn tur atangin zaa 75 pek tawh niin, sum an hman tawh dan leh hmalaknate enfiah a ni a. Endikna report hi zirchian a nih hnu ah a bang zaa 25 pek leh an ni ang. Lawmman dawngtute hmalakna tlangpui chu – ran vulh, brick siam, language hub, screen printing, salon & spa, Fitness Centre, paper cup siam, videography, tomato sauce siam, audio & video studio te a ni.
Planning & Programme Implementation department hnuaia Entrepreneurship Development Scheme master trainer pahnih – Lunglei Govt College associate professor Angnes L Khawlhring leh Lunglei DIPRO C Lalremruati te bakah Lunglei Entrepreneur Forum president V Rokhawlkima leh HPC official-ten an enfiah.
Leitlangpui Rahbi Micro Start Up Capital Competition hi HPC Lunglei leh Planning & Programme Inplementation department tangdun hmalakna niin, 2019 June 6 khan chief minister Zoramthanga’n a hawng a. He intihsiakna kaltlang hian Lunglei district-ah mahni kutkawiha eizawnna kawnga hlawhtling chho mi engemawzat awm mekin, 2019- 2020 leh 2020- 2021 khan intihsiakna neih ta ni tawh. A thawhkhatna, 2019-2020 ah entrepreneur mi 15 bultanna sum pek niin, a thawh hnihna 2020- 2021 ah entrepreneur 23 bultanna sum pek an ni. Entrepreneur-te tan hian sumdawnna kalpui dan training huaihawt thin a ni.