Electric bill dan thar thlirlet Meter reader outsource tum

Power & Electricity hotute chu an minister F Rodingliana kaihhruaiin Nilaini khan department hmalakna hrang hrang thlirin an thukhawm a. August 1 atanga Mizoram puma hman tan electric billing software thar an sawiho.
Software thar hman tan tirha electric bill siam dana harsatna awm chu tihfel thuak a ni tawh tih sawi a ni a. Billing system tharah hian consumer-ten bill pekna counter pan kher ngai tawh loin mobile application (PEDM) hmangin Mizoram khawi hmun atang pawhin mahni awmhmun atangin eng chhitna bill a pek theih a, hei hian electric hmangtute tan nasa takin awlsamna a siam a, department tan pawh management lamah nasa takin awlsamna a thlen tih sawi a ni.
He system tharah hian electric bill pawh hmuh that zawk beisei a ni a, online hmanga bill siam a nih tak avang hian consumer-ten a hun takah electric bill an dawng anga, bill hmuh loh leh hmuh tlai a awm tawh dawn lo tih sawi a ni. System thar hman a nih tak avanga collection efficiency leh billing efficiency-a hmasawnna hian Mizoram-in harsatna a tawh thin, aggregate technical & commercial loss (AT&C Loss) lamah hma a sawn phah dawn a. Paper hmanga electric bill tam tak print ngai thin pumpelh a nih dawn avangin sawrkarin sum leh pai engemawzat a hum thei dawn a ni.
Thutkhawmah hian department corporatize tura hmalakna peng pakhat atan meter reader outsource tum chu chak zawka tih hlawhtlin dan sawiho niin, bial (location) hlawm ang zela then a, outsourcing kalpui dan tur ruahman a ni.
Tunhnaia power supply khaihlak thin pawh sawiho niin, fur zualpui a reh hnu ah RDSS hnuaia hnathawh hrang hrang ngawrh lehzuala kalpui tan a ni a, mipui vantlang tana hmasawnna hnathawh kal mek a nih angin load shedding kalpui fo ngai chu mipuiin hrethiam a, dawhthei taka tuar turin department chuan a ngen tih an sawi a ni.