Electric hman man tihpun a ni lo – P&E department

Electric hman man tihpun a ni lo
– P&E department
Electric hman man an tipung loa, smart meter hman hma leh hnu chawi kawp vang zawk a ni tih Power & Electricity department chuan an sawi a. Tum khata bill pek tlak harsat tan instalment-a pek theih a ni tih an sawi bawk.
P&E commissioner K Lalrinzuali hoa Thawhlehnia P&E hotute thukhawm thuchhuak chuan electric hman man tihpun a ni lo, tiin, a hmaa meter reader-te hmanga manual reading lak thin atanga smart reading hmanga bill siam tan a nih taka avanga mipuia hriatthiam loh awmte mipui hrilhfiah nise an ti.
Electric meter reading chu mihring (meter reader) hmanga reading lak a nihin, reader-ten consumer inah kalin reading an la thin a, an reading lak chu office-ah an thehlut a, office-ah bill siam niin, bill siamfel hun chhung hi thla khat vel a ni thin a. Office-a bill siamfel hnu ah consumer hnena bill semchhuah leh a nih meuh chuan thla khat a lo liam tawh a, consumer-in thla khat hnu ah bill a hmu chauh thin tihna a ni tih an sawi.
Smart meter (smart billing system) ah chuan remote (GPRS communication) hmanga reading lak a nih tawh avangin, lak rualin office-ah bill a siam nghal theih ta a, consumer-in up-to- date bill a dawng thei tawh tih a sawi a ni.
Hun rei tak mihring hmanga bill siam a nih avangin thla khat liamta bill hlir consumer-in an dawng thin a, nimahse smart billing system hmanga bill siam thar chu up-to- date bill pek a tul tak avangin thla khat kar awl hnawh khah a ngai a, thla hnih bill kha tum khatah siam a ngaih avangin billing period a rei a, electric bill a tam ta thin tih sawiin, ‘He bill sang bik hi smart billing system-a bill siamrem thla (vawi khat) chiah a ni dawn a, a hnu zelah chuan a pangngaiin a kal tawh dawn a ni,’ thuchhuah chuan a ti.
P&E hotute chuan, billing period rei vanga vawi khata bill pek harsate tan bill counter-ah kalin instalment a pek theih a ni tih an sawi.
Smart meter la hmang ve lote pawhin an hman hunah thla khat bill ni loin, smart meter-a bill update nen an chawi ve a ngai dawn tih an sawi a. Smart meter hman tan thlaah lo chuan bill hi a pangngaiin a kal char char tawh dawn a. Smart meter hman vek hunah chuan bill tihsual a awm thei tawh dawn lo tih an sawi a ni.
Hemi chungchang hi P&E department hotute chuan 2025 June 24 khan Mizoram Consumer Union hruaitute kawmin an lo hrilhfiah tawh tih an sawi bawk.