Ella Langley “Choosin’ Texas” a la Hot ber

Ella Langley hla hit “Choosin’ Texas” chu Billboard Hot 100 (US singles) chart-ah a No.1 a, he chart-a kar sarih a No.1-na a ni ta. He hla awmna ‘Dandelion’ album chu Billboard 200 (US albums) chart No.1-ah a debut ta bawk a, tihian Ella Langley hian Taylor Swift hnung zuiin country hla leh country album hmanga a ruala heng chart pahniha No.1 ni kawp thei pahnihna a ni ta a ni.
Ella Langley “Choosin’ Texas” hi Hot 100 chart-a a hla No.1 kai thei hmasa ber niin, February thla laihawl khan No.1 a ni tan a, tunah chuan a zawn lovin kar sarih a No.1 tling ta a ni. Hetihrual hian Dandelion album-a a hla dang “Be Her” chu No.8 atangin No.4-ah a insawn a, he chart top 5-a lang thei hla pahnih a neihna a ni ta bawk.
Billboard Hot 100 chart hi kar khat chhunga US-a hla lar dan tehna niin, chart ranking siam nan hian all-genre US streaming (official video leh official audio), radio airplay leh sales data te chu tehna pawimawh a ni. “Choosin’ Texas” hi kar khat chhungin stream maktaduai 30.7, radio airplay ngaithlatu maktaduai 42.5 leh sales 10,000 a la nei thei a, hei hi a kar sarih nan chart-ah a No.1 pui leh ta a ni.
Olivia Dean “Man I Need” chu No.2-ah bawk a la awm a, chart No.1 hlui Bruno Mars “I Just Might” chu No.3-ah bawk awm lehin, chart No.1 hlui Alex Warren “Ordinary” chu No.4 atangin No.5-ah a insawn ve ta bawk.
Olivia Dean hla dang “So Easy (To Fall in Love)” chu No.6-ah bawk a la awm a, chart No.1 hlui HUNTR/X (EJAE, Audrey Nuna leh REI AMI) “Golden” chu No.7-ah bawk awm lehin, chart No.1 hlui bawk PinkPantheress leh Zara Larsson “Stateside” chu No.9 atangin No.8-ah a insawn leh hret a, Kehlani ‘Folded” chu No.10 atangin No.9 a kai thar ve leh ta bawk.
Chart top 10 khartu chu BTS hla hit ‘SWIM’ niin, chart No.1-ah kar thum a lang thei a, tunah chuan No.5 atangin No.10-ah a tawlh ta a ni.