Ella Langley “Choosin’ Texas” record siamin Hot 100-ah a la No.1

On Jul 22, 2026 1 0

Ella Langley hla hit “Choosin’ Texas” chu Billboard Hot 100 (US singles) chart-ah a No.1 a, he chart-a kar 14 a No.1-na a ni a, Krismas rimnam hla ni lo zingah chuan hmeichhe zaithiam hla sak zinga he chart-a No.1 ni rei record a rawn nihrual ta a ni. Hetihrual hian Stella Lefty pawhin a vawi khat nan chart top 10 a lang thei hla a nei ve ta bawk.
Billboard Hot 100 chart hi kar khat chhunga US-a hla lar dan tehna niin, chart ranking siam nan hian all-genre US streaming (official audio leh official video), radio airplay leh sales data te chu tehna pawimawh a ni a, “Choosin’ Texas” hian kar khat chhung official stream maktaduai 24 leh radio airplay ngaithlatu maktaduai 51 bakah sales 7,000 a la nei thei a, hei hi a kar 14 nan chart-ah a No.1 pui leh ta a ni.
“Choosin’ Texas” hi kumin February thla khan a rawn No.1 tan a, ranking-ah an tawlh sawn chang neih mah se No.1-ah bawk a rawn kir leh thin a, heti hian Mariah Carey hla ‘We Belong Together” leh Whitney Houston “I Will Always Love You” te rawn nih rualin, kar 14 theuh an No.1 tling ta a, hmeichhe zaithiam hlang hla sakah chuan Krismas rimnam ni lo hlaa he chart-a No.1 ni rei ber an ni. Krismas lam hla lak tel chuan Mariah Carey “All I Want for Christmas Is You” chu No.1 ni rei ber niin, kar 22 a No.1 thei a, he hla hi hmeichhe zaithiam bik chauh pawh ni lo, mipa pawh telin, chart No.1 ni rei thei ber a ni.
Chart No.1 hlui Taylor Swift “I Knew It, I Knew You” chu No.2-ah bawk a la awm a, Ella Langley hla dang “Be Her” pawh No.3-ah bawk a la awm a, chart No.1 hlui Ariana Grande “Hate That I Made You Love Me” chu No.6 atangin No.4 a kai thar leh ta a, Tame Impala leh JENNIE “Dracula” pawh No.5-ah bawk a la awm.
Stella Lefty hla thar “Boston” chu No.6 niin, he chart top 10-a Stella Lefty a lan vawi khatna a ni. He hla phuhtu-a hming intlar zingah Stella bakah Noah Kahan a lang a, Kahan hian a hla ‘Stick Season” chu chart No.9 a lo kaipui tawh a, “Boston” chu songwriter anga top 10-a lang thei hla pahnih a neihna a ni ve bawk.
Ella Langley leh Morgan Wallen te thawh dunna “I Can’t Love You Anymore” chu No.4 atangin No.7-ah a tawlh a, Olivia Dean “Man I Need” chu No.10 atangin No.8 a kai thar leh ta a, Olivia Dean hla dang “So Easy (To Fall in Love)” chu No.9-ah bawk a la awm a, chart No.1 hlui Bruno Mars “I Just Might” chu top 10 khartu niin, No.10 a ni bawk.