EMRS hawn leh din tur zingah Mizoram atangin pasarih a tel
EMRS hawn leh din tur zingah Mizoram atangin pasarih a tel
India ram chhunga tribal mipui hmasawnna huang ‘Dharti Aaba Janjatiya Gram Utkarsh Abhiyan’ chu Prime minister Narendra Modi chuan inbiak hmuh theihna hmangin Zirtawpni khan a puangzar a. Ministry of Tribal Affairs Department of Social Welfare & Tribal Affairs hnuaia ‘Eklavya Model Residential School’ (EMRS) engemawzat a hawng a. Heng zingah hian Mizorama EMRS pahnih hawn tel niin, panga dang a lungphum phum a ni.
Prime minister-in a hawn rual hian, hawn thar zing ami EMRS Bilkhawthlirah Kolasib bialtu MLA, deputy speaker Lalfamkima, Kolasib district bawrhsap Robert C Lalhmangaiha leh he district-a sawrkar official-te nen hun hman a ni.
Siaha district-ah EMRS Noaotla (Niawhtlang) a tel bawk a. Siaha addl DC Abraham Beirazi Khithie kaihhruaiin sawrkar department hrang hrang aiawhten an chhim.
Prime minister-in EMRS din tur lungphum a phum zing ami Mamit district-ah EMRS W Phaileng lungphum phumna chu bawrhsap Jacob Lalawmpuia hoin an lo chhim a. Hei bakah hian Sawleng, Khawbung, Khawzawl, Lungsena EMRS din tur an tel bawk.
8 EMRS Bilkhawthlirah hian academic session 2024- 2025 atangin zirna kalpui tan a ni a. Tun session atan class VI leh class VII chauh hawn rih niin, class XII thleng hawn belh tura ruahman a ni.
8 Tunah hian zirlai hmeichhia 54 leh mipa 43, an vaiin zirlai 97 an awm a; thawktu hi teaching staff leh non-teaching staff 16 an awm.
8 EMRS Noaotlah hi kum 2019- 2020 a sanction niin, kumina hawn tan a ni. Class VI & VII double section-a hawna bul tan phawt a ni a. Zirtirtu 6 an awm a, non-teaching staff hi 8 an awm. Tunah zirlai 118 – mipa 59 leh hmeichhia 59 an awm.
8 EMRS hi kum 1997-1998 khan Ministry of Tribal Affairs hnuaia National Education Society for Tribal Students-in India rama tribal naupangte zirna lama hmasawnna an neih theihnana a din a ni.
8 Mizoramah Social Welfare & Tribal Affairs department-in kalpuiin, Mizoram EMRS Society-in a enkawl. Kum 2018 – 2019 central budget ruahman angin state leh UT chhunga development block tina mipui zaa 50 tribal category awm tlinna hmunah emaw tribal mipui 20000 awm tlinna block-ah emaw EMRS hi din tura tih a ni.