END leh Police-in heroin man

Excise & Narcotics Department leh Mizoram Police chuan ni hnih chhungin hmun thumah heroin gram 885.42 (hawng 75) an man.
Excise & Narcotics Department hian July 10 zan dar 10.15 khan Bawngkawnah heroin gram 22 (hawng 2) leh a neitu nia puh – Lalrinchhana (29) Champhai Electric Veng nia inchhal chu an man a. July 11 zing dar 1.50 khan Keifangah heroin gram 826 (hawng 70) leh a neitu nia puh mi pali – Zosangliani (29) Keifang, Khaineihthang (23) leh Langkhanchin (42) Ngaizawl nia insawi ve ve, Pausianmuang (38) Champhai Bethel Veng intite chu an man a; an ni hnen atanga heroin lachhawnga Mizoram pawna hralh tura lak tum mi pathum – Ajijur Rohman (22), Ajib Uddin (27) leh Parbez Hussain (21) Silchar Assam nia inchhalte chu July 11 zing dar 6.20 khan Bawngkawnah an man leh a. Heroin phurhna atana hman car MZ 04 A 7304 leh TATA truck MZ01 P 9999 pawh man a ni.
July 10 khan Serchhip Police chuan heroin gram 37.42 (hawng 3) chu Lalmuanpuii (45) leh Zonunsanga (45), Serchhip ve ve nia inchhalte kut atangin an man bawk.