Eng chhit man tihsan tumnaah sawiselna thlen

Joint Electricity Regulatory Commission (JERC) for Manipur & Mizoram hnenah Power & Electricity department chuan Mizoram mipuiin kum 2024- 2025 chhunga eng an chhit man (electric bill) rawtna an thlen chu sawi duh nei tan hun hawn a ni a. Central YMA president hlui Vanlalruata chuan kum danga a tih thin angin, mipui tawrhna nasa a thlen loh nan ziakin a thlen.
Thawhtannia JERC hnena a thu thleng zingah, eng chhit man (electricity tarrif ) chhutnaa hleihluak lai thenkhat, a bikin thawktu hlawh (employee cost) sang lutuk leh sawrkar department ni lo, company/corporation ho chauhin an hman tur working capital an lo ziak tel ve te chu sawiselin, mahni sensoin JERC-ah hian a thlen.
Electrical engineer Vanlalruata hian kum dangah pawh eng chhit man hi mipui tana phurrit nasa tak a nih loh nan theihtawpa zirchiangin hma a lo la tawh thin a, P&E department-in JERC hnena electricity tariff a dilna chu nasa taka tih hniam a lo ni tawh thin a ni.