Prime Minister Narendra Modi an Indians tinte tana Uniform Civil Code hman tuma hmalakna neia sawi a neih vangin tun hnaiah kum 2024 inthlanpui awm hma ngeiin BJP te chuan dana siam tumin hma an la dawna ngaihna a siam a.
Zawhna lian ta ber chu : ruling party hian Parliament paltlang turin mamawh tawk MP a nei ang em? tih a ni a. Lok Sabha-ah hian BJP te chuan majority an nei ngei a, mahse, Rajya Sabha-ah eng nge ni ang?
-- Advertisement --
A theih dan a awm em?
Tun hnai lawkah BJP hmelma Aam Aadmi Party (AAP) te chuan ngaihtuahna thar awm thei an hawng tlat a. An hruaitu lawk ber Arvind Kejriwal chuan ‘a thuphungin’ Uniform Civil Code chu an pawm tiin a sawi a, mahse, kalpui a nih hmain stakeholder tinte nen sawihona neih phawt ni se a ti thung.
Rajya Sabha Math?
Upper House hian member 237 a nei mek a, seat ruak pariat a awm bawk a. Seat ruak zingah hian nominated seat pahnih a tel bawk a. Hei vang hian Upper House-a majority mark chu 119 a ni. BJP ten MP 92 an nei a, an thawhpui AIADMK ten pali neiin an thawhpui party tenau pasarih ten pakhat theuh an nei bawk a, a vaia belhkhawmin 103 an nei tihna a ni. Independent MP pakhat leh nominated member panga nen vek pawhin BJP te hian majority mark phak turin MP sawm an la mamawh tho. Naveen Patnaik kaihhruai Biji Janata Dal MP pakua nei ten an thlawp mai thei tia sawiin lo thlawp ta pawh ni se BJP te chuan finish line an la phak chuang lo. Jagan Mohan Reddy kaihhruai YSR Congress Party, tum tam tak ruling party BJP te thlawp thintu chuan Uniform Civil Code chu an thlawp dawn loh thu an sawi chiang ta thung bawk si a ni.
AAP pawimawhna?
AAP ten MP 10 an nei mek a – Delhi atangin pathum leh Punjab atangin pasarih an ni. AAP te hi Opposition party inhmuhkhawmah Congress te nen ngaihdan inang lo an nei lek lek a, hei vang hian Uniform Civil Code hi an thlawp thut thei an ti. Mahse, AAP leh BJP te chu inhal tak niin Delhi a bureaucrats thunun kawngah Centre ordinance avanga inbakkaih nasa mek te an ni. Ordinance chungchangah hian Congress chuan AAP te thlawpna a la sawi duh lo thung a, Opposition alliance zawm nan pawha Congress te kar nan bera AAP tena an hman a ni tho bawk. Zawhna awm ta chu AAP te hian an hmelma tho BJP te hi an thlawp thut ang em tih a ni.
Rajya Sabha poll neih tur
Parliament monsoon session chu July thla chawlhkar thumnaah neih a nih tan hmel a, chumi hnu lawkah Rajya Sabha seat 10-ah inthlanna neih a ni ang. Seat 10 ruaka seat ruk chu West Bengal-ah niin Gujarat-ah pathum leh Goa-ah pakhat a ni. Bengal bikah hian seat nga chu ruling Trinamool Congress te chan mek niin pakhat chu Congress chan a ni bawk. Tun tumah erawh BJP te chuan Bengal atangin a tum khat nan Rajya Sabha MP nei thei an ni thung. Gujarat-ah chuan BJP te vek niin Goa ah pawh BJP te tho an ni bawk.