Kum 2022 khan khawvel chuan ram ngaw 4.1 million hectares hlohin chu chu minute tina football field 11 vel hu hloh ang a ni tiin World Resources Institutes (WRI) Global Forest Watch te chuan an sawi a. Ramngaw hian carbon dioxide emission 2.7 biollion tonnes vel a hloh nghal bawk a ni.
University of Maryland te chuan primary forest cover kum 2022 a hloh chu kum 2021 a hloh aiin 10% in a tam zawk an ti bawk.
-- Advertisement --
Eng nge primary forests?
Primary forests te hi puitling tawh, natural forest hun rei tak chhung khawih danglam loha awm tawh te an ni a. Heng ramngaw te hi chuan ram ngaw dang zawng aiin carbon an khawlkhawm hnem zawk a, biodiversity source hausa tak a nei bawk. Primary forest hloh tawh te hi neih let leh mai theih a ni tawh lo va, siam that leha thing te thang lian leh pawh ni se seconday forest ni tawhin primary forest anga biodiversity leh carbon hup beh a neih ang kha a nei let leh thei tawh lo.
Global Forest Watch te thil hmuh
Khawvel chuan forest kaihhnawiha intiamna a neih tinte chu a tihlawhtling thei dawna ngaih a ni a. WRI te chuan hmasawnna chu tehna pahnih hmangin an teh a – kum 2030-a ram ngaw tihchereu tihtawp hman leh kum 2030 a ram ngaw hloh tawh 350 million hectares (Mha) te humhim leh te niin hengte hi khawvelin a intiamna a ni.
Kum 2 030 target tihlawhtling tur chuan khawvelin kum tinin global deforestation chu 10% talin a tihtlem a ngaia ngaih a ni a. Kum 2022 khan global deforestation rate chu 3.1% niin chu chu kum 2018-2020 baseline aiin a hniam zawk a, tichung chuan target pha tur chuan one million hectares ai tam hret la ngai a ni an ti bawk.
Kum 2030-a forest 350 Mha a ngaia dah leh tur chuan khawvelin kum tinin thingin a khuh 22 Mha in a tihpun a ngai bawka ngaih a ni a. Hmun thenkhatah hmasawnna tun hnai kum 20 chhunga a awm chungin net loss 100 Mha a la awm tho thung a. Chumi awmzia chu mamawh tawkin ramngaw siam theih a ni lova ram ngaw hloh chu a la sang hle tihna a ni.
Khawvela tropical forest nei zau ber chu Brazil leh Democratic Republic of Congo te niin ram pahnih te hian kum 2022 khan ramngaw an hloh nasa hle thung a. Gahna leh Bolivia pawhin primary forest an hloh chak hle bawk a. Chutih laiin Indonesia leh Malaysia te chuan primary forest an hloh chu kum 2022 khan an titlahniam duai thei thung.
Brazil-in primary forest a hloh vak hi Jair Bolsonaro presidency kum tawpa thleng a ni tiin WRI te chuan an sawi a. A hun lai khan Bolsonaro chuan khawvel sawisel a tawk nasa hle a, a hun laiin Amazon basin-ah ram ngaw tihchereu a nasa hle reng a ni.
Brazil-ah hian kum 2021-2022 chhung khan primary forest hloh chu 15% lai a ni a, kangmei vang ni lova ram ngaw hloh pawh kum 2005-a a san ber tum kum 2022 khan a thleng bawk.
Amazon basin ram ngaw chereu hian carbon mai ni lo helai bial vela ruahtui tla thlengin a nghawng a. Tun ang renga ram ngaw hloh a nih chuan harsatna nasa tak a thlen dawn an ti bawk.
Democratic Republic of Congo pawhin kum 2022 khan primary forest million hectares zahve vel lawih a hloh a, tun hnaiah ram ngaw a hloh nasa hle a, mipui an pung zel a, eitur mamawhna nasa chuan agriculture lama chetlakna a tihpun nasat vang a ni pakhat bawk.
Primary forest te hi short-term cultivation atana hal thin a ni a, a hnuah soil nutrient te insiam tha leh turin kalsanin a awm thin a. Mahse, ei tur mamawhna nasa zel chuan chung ram te khawih leh hun chu a tizim ta thin a ni.
Democratic Republic of Congo ram ngaw humhim a nih theih nan hian kum 2021 khan United Nations Climate Change Conference, Glasgow a neihah $ 500 million thehchhuah a ni a, mahse, chung zum te chuan nghawng tha a la nei meuh lo.
Indonesia erawh khawvel ram zinga primary forest hloh tun hnaia titlem ber a ni thung a, Malaysia pawhin nasa takin hma a sawn bawk a. Anni ram bakah hian Costa Rica, China, Cote d’Ivoire, Vietnam, Gabon, Madagascar, Nicaragua leh Equatorial Guinea te chuan hma an sawn nasa bawk.
Global Forest Watch te chuan India-in kum 2021-22 khan primary forest 43.0 thoustand hectares a hloh an ti a, hetih chhunga thingin a hual khah vek a channa chu 17% lai a ni. Kum 2021 leh 2022 a India-in tree cover hloh a neih chu 255 thousand hectares tia sawi a ni bawk a.
Kum 2022 khan khawvel huapin tree cover loss chu 10% a tlahniam a, heng zingah hian primary, secondary leh planted forest te pawh a huam tel a. Hetianga a tlakhniamna chhan hi Global Forest Watch te chuan kangmei kaihhnawiha hloh tih tlem a nih tak vang ni berah an ngai a ni.