India rama leng mek H3N2 subtype seasonal influenza avangin mi pahnihin nunna an chan tawh niin Health Ministry chuan a tarlang a. Ram pum huapa surveillance neihnaah kumin chhungin H3N2 kai mi 451 hmuhchhuah an ni tawh bawk.
“India hian kum tinin seasonal influenza tum hnih – pakhat zawk chu January atanga March inkar chhung leh a dang chu post-monsoon season-ah a tawng ziah a. March thla tawp lam atang hian he seasonal influenza hi tlahniam tura ngaih a ni,” tiin Ministry chuan a tarlang bawk.
-- Advertisement --
Eng nge H3N2?
Influenza A virus te hi mihringa seasonal flu disease thlentu anga ngaih a ni a. Hengte hi virus surface a protein subtype pahnih hmuh dan azirin then hran a ni a. Chung te chu : hemagglutinin (H) leh neuraminidase (N) tia sawi a ni. H-subtypes 18 a awm a, N-subtypes 11 a awm bawk. Influenza A subtype combination hrang hrangte hi 130 chuang hmuhchhuah tawh niin mahse virus te hi inthlak danglam thei an nih avangin subtype hrang hrang a awm theih phah tiin US Centres for Disease Control and Prvention te chuan an sawi.
H3N2 subtype te hian influenza subtypes dangte aiin damdawi In indahluh ngaihna a thlen tam zawk, tiin Ministry of Health and Welfare chuan a sawi a. Severe acute respiratory infections (SARI) nei zahve zawng leh outpatient a awm influenza ang tak symptoms nei te surveillance data December 15, 2022 leh March 10, 2023 a lakkhawm te chu H3N2 kai te vek an ni tih hmuhchhuah a ni.
SARI patinet H3N2 kai zigah 10% te chuan oxygen an mamawh a, ICU a dahluh mamawh 7% an awm bawk.
A lanchhuah dan
H3N2 subtype influenza A virus kai te hian flu symptoms pangngai Covid-19 symptoms ang tak – khawsik, khuh, taksa na, thawk hara, hahchhiau leh peneumonia te an nei thin.
Seasonal influenza te hian khuh nasa tak kar hnih emaw thum emaw lai daih a thlen thei bawk a, heng damlote hi damdawi hranga inenkawlna tel lo pawhin kar khat velah chuan an ziaawm leh mai thin.
World Health Organisation (WHO) chuan naupai lai, naupang kum nga hnuai lam, kum upa, natna benvawn heng – chronic cardiac, pulmonary, renal, metabolic, neurodevelopment, liver leh hematologic disease nei sa te leh mimal immunosuppressive condition nei – HIV/AIDS, chemotherapy emaw asteroid la mek ang te chuan an la na zual thei a ti.
Tihdamna a awm em?
WHO chuan H3N2 infection enkawl nan hian oseltamivir (tamiflu) a chawh a, he damdawi hi India ramah chuan public health system kaltlangin a thlawna lak mai theih a ni tiin health ministry chuan a tarlang.
India ramah oseltamivir hralh hi Schedule H1 of the Drugs and Cosmetics Act, 1940 hmanga phal a ni.
Invenna
Mithiamte chuan sahbawn leh tui hmanga kut silfai that chu H3N2 subtype kaina laka invenna tha ber tiin an sawi a. Sorkar chuan khua leh tui te chu hmaituamna hmang tur leh punkhawmna hmuna awm lo turin thurawn a pe bawk a.
Khuh dawna ka leh hnar hup te, mit leh hnar khawih te, tuiril la in a fimkhur te chu H3N2 infection laka invenna tiin Health Ministry chuan thuchhuah a siamah a tarlang a. Union Health Ministry chuan mipui te chu antibiotics emaw damdawi dang te doctor te rawn lo chuan ei lo turin a ngen bawk.