ENG RILRU PUIN NGE VOTE KAN THLÂK DÂWN?

Rev. Dr. Zaichhawna Hlawndo

-- Advertisement --

In thlang ram kan ni a, ram leh khawtlanga rorêltu tur kan thlan chhuah ten ro an rêl thin. Democracy ah chuan mipui vote tam ber hmangin rorêltu tur kan siam tih chu kan hre vek ang. Chuvang chuan rorêltu tur siamna kawngah mawhphurtu lian ber chu tudang nilovin mipuite kan ni. He mawhphurhna lian tak mai hi kan hma lawkah chhawp chhuah a ni leh dáwn a. Kum 5 chhung atâna kan veng/khawtlâng rorêltu tur VC/LC thlang turin kan inpuahchah mêk a ni. He inthlan lo awm tur hi politician te chuan mutmawh hnar mawhah an nei a. An party dinhmun sawhngheh nâna hman tumin theihtâwp an chhuah mêk a ni. He VC/LC inthlan ah hian eng rilru puin nge vote kan thlâk dâwn tih hi ngaihtuah ngun a ngai tak zet a ni. Rorêltu ni tura inpe (candidate) VC/LC te chu eng rilru puin nge an lo din? tih pawh ngaihtuah chian a ngai. Eng party ticketin nge an din tih ai chuan Pathian tih tlat mi an ni em? Mi taima leh dikna ngaihpawimawh an ni em? Khawtlâng hmangaihtu an ni em? tihte kan ngaihtuah hmasak a ngâi. Mipui tan rawngbawlna hna thawk duh tak tak mi tha leh fel kan neih a, mipuiten vote kan thlâk dan rilru a dik chuan rorêltu tha kan siam ang a, kan rilru a thatloh chuan kum 5 chhûng chu rorêltu thalo tak hnuaiah kan kun dâwn tihna a ni.
Lalpa Pathianin ka pianna ramah missionary hna thawk turin min rawn tir hawng a. Kum 10 chuang chu party politics thalo tak hmanga setanan Zofate min awpbeh dan te, kan zonunzemawi a thiah dan leh kan Kristianna a tihdal dan te min au tir a. Kan ramah party politics hmanga lal leh thuneihna in chuhna awm tawh lova, Pathian Lal Ram Sawrkar lo din dan tur thu ka dawn chu Mizoram dung leh vang fangin kan au. Chu Pathian Lal Ram Sawrkar (PLRS) chu a taka lo din theihna turin chi kan tuh . Mizoram dung leh vang mai bakah Zofate chênna ram tam tak kan tlawh kual tawh. Kum 2018 Mizoram inthlan ah khan mi 18 in MLA Bial 23 ah Lalpa nena kan inneihna thuthlung bawm ‘Zungbun’ kan hung a. Kum 2023 inthlanpuiah khan mi 18 bawkin MLA Bial 21 ah Lalpa Lal Ram tan kan ding leh bawk. Mipuite pawhin kan thusawi chu tha kan ti êm êm a, hnialna tur pawh kan nei lo. Mi tam takin rilru thianghlim takin party politics chhuahsanin Pathian Lal Ram Sawrkar (PLRS) tan Zungbunah vote an thlâk. Amaherawhchu mipui tam zawkte chuan kan party politics rilru kha kan sawhsawn thei rih lo. Kan rilru a tha kan tih êm êm Pathian Lal Ram tan khan vote kan la thlâk thei rihlo. Party politics salah kan la tan rih vang leh Pathian hun ruat ala thlen famkimloh vang a ni. Zofate thinlunga Pathian Lal Ram chi kan tuh zawng zawngte kha a tiak mêk a, a lo thang duang zêl a, hun reilote chhungin a parin a rah chhuak thuai dawn a ni. Chu hun chu Zofaten dingdihlipin kan thlir mék a ni.
Kan rama khawtlâng roreltu VC/LC kan siam dan leh thlan danah hian mipui kan pian thar a ngai. VC/LC atan hian party sawrkar siam tur tih danah a awm hran lova a tulna pawh a awm lo. VC/LC ah roêltu (ruling) bik emaw eptu (opposition) awm tura ngaihna hi inbumna mai mai a ni. He rilru thalo tak Party politician ten an tuh leh an siam hi khawtlang mipuite min thendarhtu, min indo tirtu leh Zonumawi thiat a, kan Kristianna nena inkalh a ni tih kan hriat a ngai. He party politics kal phung ‘ thattheihmiahlohna Bawm’ hi kan siam that emaw kan thiah loh chuan engtikahmah Zofate tan rorelna tha, thianghlim leh dik kan din thei dawn lo tih hi a chiang a ni. Party politician ten an mahni pary tanghma ngaiin mipuite hi an indona mual lian puiah min siam a ni tih hria a kan thanharh a hun tak zet a ni.
Zofa ringtûte hian sual kan do dan koki kan thlâk a ngâi. Kan rama sualna zungber chu party politics hi a ni tih kan hriat ngei ngei a ngâi. Israel fate pawh khan an hmelma Philistia mite nena an in hmachhawn khan an aiawh tura an rawn tirh Goliatha kha hneh hmasak a ngâi. Davida khan ama chakna leh thiltihtheihna nilvoin Lalpa chakna hmangin a hneh a nih kha. An lal ber tihhlum a nih veleh Philistia mite chu an tlawm ta vek ang khan, he kan rama milembiate tih dana party system lal leh thuneih inchuhna tenawm tak hi kan do rawn a, kan thiah a ngâi. Kan ram rorelna ah hian democratic government nilovin theocratic government kan din ngêi ngêi a ngai. Pathianin kan ram rorêlnaah hmun laili leh pawimawh ber a chan theihna tur chuan Party sawrkar siam lova Pathian Lal Ram Sawrkar kan din a ngai a ni.
Tun tum VC/LC inthlan lo awm turah te hian Lalpa tihmite hi party ticket nilovin Lalpa tana missionary hna thawk turin lo pen chhuak sup sup se ka va ti em! Mipuite pawhin kan khua/veng chuan thleibik nei party VC/LC kan duh velo tih rilru puin vote thlak ngam ila, mi tha leh fel Pathian tihmi kan thlan ngam a ngai tak zet a ni. Theih phei chu nise in thlan kher ngailo hian kan veng/khua VC/LC tur an ni hi ni mai rawh se ti mai thei ila, inthlan a sum tak tak seng a, party politics bawlhhlawh tak in rawlh ngailo pawh hian a tih theih reng a ni.
VC/LC thlanna atâna kan rilru put dan kan thlâk lova, party politics rilru kan paih hma chuan khaw lungrual emaw veng lungrual, khaw nuam leh veng nuam kan siam thei lovang. Khawtlang rorelna ber kha a bawlhhlawh tlat chuan a tuartu chu tudang nilovin rorelna siamtu mipuite bawk kan ni. Party politics a in hmangte hi Kohhran mite vek kan nih avangin Kohhran pawh a nghawng lo thei lo. Rorêlna dik lui anga a luan a, felna chu luipui kang ngailo anga a luan hun tur hi ava nghahhlelhawm teh lul em! Midang tih dan ang a tive mai duhlo, dikna tan ngam, mi huaisen ramin a mamawh tak zet zet a ni. Party Sawrkar nilo, Pathian Lal Ram Sawrkar (PLRS) thuiloh kawrfual hate hmanga rorelna Lalpan min din sak tur atan i in buatsaih zel ang u.

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More