Eng vangin nge BJP ten chakna an chan?

State lian pali (Chhattisgarh, Madhya Pradesh, Rajasthan leh Telangana) inthlan result-ah Indian politics a zawhna pawimawh tak pahnih chhanin a awm a tih theih em tih a ni a.
Bharatiya Janata Party (BJP) la lian zual zel chu eng vang nge tih leh pahnihna chu Opposition (a bik takin Congress) tho lutuk thei lo chu eng vang nge tih a ni bawk.

BJP te chak chhan?
State pathum – Chhattisgarh, Madhya Pradesh, Rajasthan a BJP te chak chhan chu sawi fak tur hriatfiah a har tih a ni a. Mahse, a lan danah BJP te chuan an welfare model leh organisational machinery tha tak chu an hlawhtlinpui chhan nia ngaih ber a ni a. Heng thil pahnih te hi a pawimawh rualin a ber a ni lo an ti tho thung.
Chhattisgarh leh Rajastahn-ah chuan welfare scheme-ah ngat chuan Congress an chungnung zawk em em thung a. He thilah kher chuan Congress Chief Minister pahnih Bhupesh Baghel leh Ashok Gehlot te chuan fak an hlawh ngang mai.
Heng state pahnihah te hian party chhunga inhruipawhna awm bawk si leh BJP te inthununna tha bawk centralised bawk si chuan State-level leadership te a tichhe zual tih a ni bawk. Heng state pahnihah te hian kum nga chhungin BJP ten an inpuahchah tha em em bawk a.
Chutih rual chuan Madhya Pradesh-a State leadership chu kum sawm chuang sorkar tawh anti-incumbency in a tibuai nasa tho a, tichung chuan chakna an chang leh thei tho a, hei vang hian welfare scheme leh organisational machinery that vang tingawt ila BJP te chuan kumin May-a Karnataka inthlanah te an chak leh chuang hauh lo.
Heng State pahnih bika BJP te chakna chhan ber ngaih chu pakhatnaah an ideological agenda, Hindu nationalism bur mai vang a ni a. Pahnihnaah chuan charismatic national leadership Prime Minister Narendra Modi hona hnuaiah vang a ni bawk a. An ideological agenda te chu super-charged electoral campaign nen an chawhpawlh a ni.
Tunah chuan a bik takin Hindi belt ah BJP te chuan core ideological vote bank nei tlat tawhin leh sawhnghet zelin eng inthlanah pawh advantage an nei tawh ang.
Rajasthan-ah pawh Axis India Today tena survey an neih ang chuan upper castes ten Congress aiin BJP an vote zawk tih a ni a. Tun hmaa Brahmins, Rajputs leh Baniyas te inelna in State politics a bawhbuai chu a bo ta tia ngaih theih a ni.
Hindi belt-ah hian Other Backward Classes te chu BJP te thlawp bertu an ni tawh bawk a. Axis India Today survey-ah Rajasthan-a OBC 26%, Madhya Pradesh ah 24% leh Chhattisgarh-ah 13% ten BJP an vote tih a ni.
OBC tam leh lian ten BJP an thlawp bur tawh anga ngaih a ni bawk a. Urban leh upwardly mobile OBC te chuan National Democratic Alliance ideological agenda chu an awn tih a ni bawk. Inflation san chhan zawhna siamah pawh upper caste 54% leh OBC 48% te chuan State sorkar mawhphurtuah an ngaih laiin Dalits 31% leh tribal 33% te chuan centre ah ti thung. Freebies chungchangah pawh upwardly mobile OBCs (Yadav, Kurmi, Lodhi, Gujjar) te ngaihdana rual loh laiin Most Backward Castes, Dalit leh tribal voters te chuan freebies an duh thung.

Opposition leh Congress
Modi charismatic leadership leh a pupulist personality-based appeal chu tawrhhlelhawm taka ngaih a ni a. Modi mimal larna hi a turu hle a, Modi lal chungin Congress Chief Minister pakhat mah tling nawn an la awm lo.
Congress te chak loh chhanah a bik takin North India-ah Kamal Nath te ang chu old guard ni tawhin an hun a liam tawha ngaih a ni. An kaihhruaina hnuaiah party-in progressive agenda an kalpui tak tak dawnin an dang tlat bawk si a ni. Old guard te chu status quoist an ni tlangpui bawk a, chu chuan party chhungah inbeihna thlenin thalai zawk tena caste census te ang neih an rawtna te chu an danchah sak tlat bawk a. Caste census agenda hi Congress ten tun hnaia State pathum inthlanah an dang chat vek a ni.
Congress Chief Minister Baghel leh Gehlot te ang chuan anmahni el pha thei tura ngaih Sachin Pilot leh T.S. Singh Deo te chu an dangchat hmak bawk a, chu chuan State Congress organisation tichhiain bureaucrats leh ministerial aides te nena rorelna kalpui zawk an thlanna chuan party a tichak lo bawk.
Telangana-ah erawh Congress ten chakna an chang thung a. Telangana bikah hian Dalit leh tribal vote te hui tumin kum tluanin an bei a, electoral promise mit la zet zet an neih loneitute tana subsidy pek te chu thatpui bawk a. Telangana leh kumtir lama Karnataka-a Congress te chakna chhan chu leadership tha awmin ideological agenda tha nena chawhpawlh chuan a tichak tia ngaih a ni.
Ram pum huapin BJP te chu party lian leh chak ber an nih mek laiin southern India-ah thung chuan Congress te chu party chak ber an ni mek thung a. Kum 2024 Lok Sabha inthlan chuan eng tiangin nge danglamna a siam dawn tih chu hunin a hril tur a ni.