Synod Inkhawmpui nei mek

Synod Inkhawmpui vawi 100-na chu Thawhlehni atang khan Mission Veng Presbyterian Kohhran biak inah neih a ni a. December 10, Pathianni thleng a awh ang.
Thawhlehni khan Nomination Committee an thu a. December 6-9 chhungin rorel a ni ang. Zan lamah vantlang Pathian biak inkhawm neih thin a ni anga, Pathianni chawhmaah pastor nemngheh leh pro. pastor dahngheh inkhawm neiin, chawhnuah Lalpa Zanriah Sakramen inkhawm, zan inkhawmah moderator valedictory sermon a ni ang.
Kumin Synod Inkhawmpui thlarau lam thupui chu ‘Kraws pua Isua zui’ (Luka 9:23) a ni a, Inrinni zanah Rev John Raldosanga, Bethlehem Venglaiin thupui a sawi ang.
Kumin 2023 Synod Inkhawmpuia puipa turte chu: moderator – Rev R Vanlalnghaka,
secretaries – Upa B Lalhmunliana (Sr) & Rev PB Mankima (Jr), finance officers – Rev VL Luaia Hranleh (executive secretary) & Rev PC Pachhunga, statistician – Upa Dr Lalnunsiama Colney, senior executive secretary – Rev C Zorammawia, executive secretary – Rev Dr K Lallawmzuala te an ni.
Synod Inkhawmpui hi kum 2010 atang khan bialin an thleng tan a, kumin hian Mission Veng bialin Mission Veng Kohhranah an thleng a ni.
Kum 1925 khan Assembly tiin inkhawmpui hmasa ber hi Mission Veng Presbyterian Kohhran biak inah neih a ni a, Rev FJ Sandy chu moderator hmasa ber a ni. Mizo zinga moderator hmasa ber chu Rev Chhuahkhama niin, kum 1932 khan moderator a ni. Secretary hmasa ber chu Upa Chawnghnuaia a ni. 1933 atangin treasurer neih tan a ni a, Rev EH Williams leh Rev EL Mendus chu treasurer hmasa ber an ni a, Mizo zinga treasurer hmasa ber chu Muka a ni. Kum 1973 atangin treasurer tih hi finance officer tia thlak a ni.
Inkhawmpui hi kum 1925 atanga 1952 thleng Assembly tih a ni a, 1953 atangin Synod tia thlak a ni. Kum 1961 khan February leh December ah Synod Inkhawmpui hi neih a nih avangin kumin hi a vawi 100-na a ni a. Synod Inkhawmpui kum 100-na (centenary) chu 2024 hian Mission Vengthlang Kohhran biak inah neih a ni ang.