Eng vangin nge NEET-UG 2024 result a buai?
June 13 khan Union government chuan Supreme Court hnenah common undergraduate medical entrance examination, NEET-UG 2024, May 5 a neiha zirlai 1,563 te score card a compensatory mark pek chu an cancel thu a hrilh a. Heng zirlaite tan hian June 23-ah exam a huaihawt tha leh dawn ti bawkin result chu June 30 ah puan a ni ang a, July 6-ah seat atana councelling chu tan a ni ang a ti. Heng zirlaite hi grace mark tel lovin an mark score hrilh an ni a, an duh chuan an exam nawn leh thei ang a ti bawk a. An exam nawn leh loh chuan May 5 a an score zah chu an ring tlang thung ang a, grace mark a tel lovang a ti.
Eng nge thleng?
Court chuan NEET centre paruk atanga zirlai 1,563 te hnena ‘normalisation formula’ behchhana exam hun 3.2 hours chu technical issue avanga pek an nih loh avanga grace mark pek ngawt chu an khing a ni. NEET huaihawttu National testing Agency (NTA) chuan committe dinin candidate te hnenah chuan grace mark pek ni se a ti ta a ni. grace mark inpek bik chu hleih neihna a ni a, langtlang a ni lo bawk an ti.
NEET 2024 puhna?
NEET-ah zirlai ten zawhna 180 (MCQ type) mark 720 pu an chhan a ngai a. Chhanna dik pakhatah zirlaiin mark li zel a hmu a, chhanna a tihdik lohin mark khat zel paihsak a ni thung. Chuvang tak chuan grace mark inpek chuan lungawilohna a siam ta a ni.
Chu ringawt chu NEET 2024 sawiselna a ni lo va. Kumin hian question paper leak tia puh ni bawkin, question paper sem muan te, question paper dik lo pek te, OMR sheet dik lo te, technical delays te pawh a tel.
Evaluation neih hnuah sawisel tam tak awm zingah zirlai 67 chuan mark 720-ah 720 an hmu a, zirlai thenkhatte mark hmuh chu awm ang lo khawpa tam niin a thenah chuan proxy hmanga cheating kalpui tia sawi a ni bawk a. Question paper putru chungchang hi chu a hranpain Supreme Court a thubuai awm mek a ni bawk.
Tun kum lovah pawh NEET exam chu inrelbawlna chhia leh ruahmanna tha lo tia sawisel tawh niin exam hall a candidate te thawmhnaw hak chungchangah te pawh sawisel a hlawh tawh bawk.
Heng thil hrang hrang avang hian zirlai leh political party hrang hrangte chu an lungawilohna lantirin political party te chuan sorkar chu chhui chianga NEET exam a thara buatsaih turin an ti bawk. Zirlaite pawhin test chu neihthat leh an ngiat bawk a, a chhan berah pawh question paper leak hmangin zirlai thenkhat ten full mark an hmu a ni an ti bawk a. Mithiamte leh zirlai te chuan NEET chu common entrance test a nih anga quality-control chungchanga tuna thil thleng te hian a tihlawhchham an ti bawk.
NTA chuan heng puhna hrang hrangte enfiah tur hian member pali awmna committee a din ta a, chung panel te rawtna chu court-ah khinin a awm ta mek bawk.
NTA chhanletna
NTA official te chuan kuminah kum dang ang lo takin full mark score an tam chhan chu exam paper a awl vang tiin an sawi. Member pali awmna comittee dinin chung panel te chuan zirlai 1,536 te hnena grace mark pek bik chu a fuh lo an ti ta a ni. Chu mai bakah grace mark pek te tan bik chuan exam that leh a rawt zui bawk.
Engtin zel?
Zirlai leh education expert te chuan zirlai tlemte te tan chauha exam that leh huaihawt chu an sawisel nasa hle a. Zirlai 1,500 vel te tana exam cancel a ngai tih a nih chuan an tihdikloh leh tihsual an pawm tihna a ni ang ,a chutiang a nih chuan May 5 a exam hmachhawn zawng zawng te tan re-test an kalpui zawk tur a ni. System hlawhchhamna pholanna leh pawmna a ni tiin social media lamah zirlai ten an sawisel nasa hle.