England an chak zo lo

Thawhtan zana Euro 2024 khel tur zawnna inkhelah tling chiang tawh England chu mikhual an nihna Tose Proeski Arena-ah an chak zo lova, mualneitu North Macedonia nen 1-1 in an hnehtawk. Inkhel dangah Northern Ireland chuan si hnih faiin Denmark an hneh nawlh a, inelna lian hmachhawn turin tling zo lo mah se hnehna nen a tawp an khar.
Group C-ah tlawm nei lova kal tluang a, group leader ni chiang tawh England hian tla chiang tawh, beisei tur dang nei tawh chuang lo North Macedonia chu Tose Proeski Arena-ah an luh khung a, mikhual ni mah se chak ngei tura rin a ni. Three Lions hian an khel hnuhnung berah si hnih faiin Malta an hneh a, hnehna nen ngei an tawp khar tum viau mah se an tum an tihlawhtling zo ta lo thung.
North Macedonia hian an mikhual team lian England lakah rin phak bakin an khel tha a, goal thun hmasa zawkah an tan bakah England goal neih chhun pawhin an mahni tihluh, own-goal a ni nghe nghe. An mualah hmuhnawm taka inlan North Macedonia tan hian Enis Bardhi chuan minute 41-naah hmahruai na goal a thun. Captain Enis Bardhi hian penalty pet goal lo zet mah se ball ber let leh chu goal-ah a lo chantir leh ta tho a. A goal thun hmang hian si khat faia hmahruai chungin chawlhlawk an hmang zui ta a ni.
Chawlhlawk hnu lamah England in an si phurh sut ngei tumin tan an khawh a, goal pawh an thawkchhuak thuai. Minute 51-na lekah Phil Foden corner pet tha tak chu North Macedonia player Jani Atanasov chuan an lamah a ti-goal a, England si phurh a sutsak. Atanasov hian ball khawih lo pawh ni se England captain Harry Kane chuan goal-ah a chintir zui tho dawn niin a lang. 1-1 a nih hnuin inkhel a hmuhnawm zui viau a, goal thun tumin innawr chiam mah se goal dang a luh belh thei tawh lova, North Mace-donia chuan England lakah mak tak maiin tlawm an pumpelh zui ta a ni.
North Macedonia lakah chak zo lo mah se England hian pot 1 chang tura an mamawh point an hlawhchhuak. Euro 2024 a intum tur pawh a nih hunah pot 1 an chan dawn vangin inelna thlengtu Germany bakah Spain, France, Portugal leh Belgium te nen group khatah an awm ho dawn loh phah. Hei ngawt pawh hi England tan thlakhlelhawm tak a tling. Group C atang hian tlawm nei lovin England an tlang a, point 14 hmu pahnih Italy leh Ukraine zingah champion lai Italy tlang zawkah an tang a, an trophy kawl mek humhim turin Germany an pan theih phah dawn. Ukraine hian play-off an khel zui ve thung ang.
N. Ireland an chak nawlh
Euro 2024 khel tur zawnnaa beisei phak lo, inelna lian hmachhawn phak lo chiang tawh Nothern Ireland hian Group H a champion chiang tawh Denmark an hmachhawn a, Windsor Park-a an mikhual Denmark lakah hian si hnih faiin hnehna an chang nawlh a, chak chungin a tawp an khar.
N. Ireland hian an mualah goal an thun thei lawk lova, an mikhualte nen an inawr tawk hle. Hun rei tak goal thun thei an awm loh hnuin minute 60-na ah Isaac Price chuan hma-hruaina goal a thun ta nawlh. He goal hian mualneitu team a fuih phur viau a, thothang tha takin an mualah an inlan chhunzawm a, hun tawp dawn hnaih minute 81-naah Dion Charles chuan an goal hnihna thunin an hmahruai na a tizauh belh a. Hun tawp thlengin goal dang a luh belh lo va, inelna lian hmachhawn tur Denmark lakah si hnih faiin an chak zui ta a ni.
Group H-ah pahnihna ni chiang tawh, Denmark pelh theih beiseina tlem la nei Slo-venia chuan Stadion Stozice-a an mikhual Kazakhstan chu 2-1 in an hneh a, pahnihna ni chungin Euro 2024 hmachhawn turin an tling. Group H-ah hian table chunga awm pahnih Denmark leh Slovenia te hian khelh 10 atangin point 22 ve ve an hmu a, a chung berah Denmark an awm
Slovenia hian an mikhual Kazakhstan lakah an khel tha naa goal an thun mai thei bik lo. Chawlhlawk dawn hnaih minute 41-naah Benjamin Sesko chuan penalty atangin hmahruaina goal a thun thei hram a, si khat faia hmahruai chungin chawlhlawk an hmang.
Chawlhlawk hnu lamah Kazakhstan in bul an tan tha ve thung a, minute 48-na lekah Ramazan Orazov chuan goal thunin an si phurh a sut. Hun rei tak chhung 1-1 a an inhnehtawk hnuin mnute 86-naah Benjamin Verbic chuan an chakna goal a thun a, 2-1 in an chak zui ta a ni.