England captain Kane a fit

Three Lions tan game 89-a goal 62 thuna England tana goal khung hnem ber ni mek Harry Kane chu Euro 2024 khel tur squad-a thlan a nih hnu lawkah manager Gareth Southgate chuan a captain dam that thu leh Germany ram tournament lamah a rilru a sawrbing kal mek tih a sawi.
Kum 30 mi Kane hi Champions League semi-final second-leg khela Bayern Munich-in Real Madrid an luhkhung tum khan hliam avangin second half-ah lakchhuah a ni a, a team an chak lo zui a; a hnuah tun season liamtaa Bayern Munich Bundesliga game hnuhnung pahnih kha a khel thei lo bawk.
Bayern boss kal chhuak tur Thomas Tuchel chuan Kane dinhmun sawiin, hnungzang na a tawh avangin chet vel a harsat niin a sawi.
Chu chu tunhnaia a dinhmun a nih laiin Southgate chuan squad atangin a thlathla phal lo a, Euro 2024 khel tur squad a puan hnu lawkah a striker rinrawl ber chu ngai awh tluka a dam that leh tawh thu sawiin, hnungzang na chu thil thleng ve thei reng a nih thu leh tun dinhmunah enghelh tham a nih loh thu a sawi.
Nimin lama tarlan tawh angin, Euro khel tur England squad la tlitfim leh tur player 33 koh phawt zingah hian English player langsar pahnih Marcus Rashford leh Jordan Henderson an lang ve ta lo.
Kum 26-a upa Manchester United forward Rashford hi tun season Premier League-ah khan a chetha tawk lo a, league match 33-ah goal sarih chiah khungin, assist vawihnih a nei leu leu bawk!
Tun season kal laiah England tan game sarih khel tawh mah se March thlaa Belgium an tum tum khan koh a ni lo.
Rashford pawh hi a vui hran lo niin a lang a, social media lamah training squad thllak phochhuak chungin caption-ah ‘wishing Gareth and the boys all the best’ tih a dah.
Henderson thung hian nikum nipui thawt lai khan Liverpool chhuahsanin sum tamna Saudi Arabian club Al-Ettifaq a zawm a, chhuahsan lehin kumin January thla khan Dutch team talbuai Ajax-ah a insawn a; a club khelhna a hniam ta bawk a, ram tana koh pawh a hlawh pha ta lo a ni!
Southgate hian player pasarih a la paih leh dawn a, tournament atana squad thehluh theih hun hnuhnungber June ni 7 zanlai thlen hmain player 26 awmna squad a khawrpum ang.