Nadal-a hna hmasa hautak dawn

A record kawl lai belhchhaha French Open title tum 15 lak tlin a tumna kawnga a match hmasaberah Rafael Nadal chuan German fourth seed Alexander Zverev a tum dawn a, second round a lut zo ngei dawn em a chiang rih lo!
Kumin kum tawp ruala professional tennis chawlhsan rilruk ve tawh Spaniard hian a ropuina mual Roland Garros-ah kumin hian a tawpna ni tawh turin French Open khelh leh ngei a tum a, mahse, kuminah pawh hliam neuh neuhin a la tihbuai fo avangin Paris clay-court grand slam-ah hian a inlan thei ngei dawn em tih a chiang thei mai lo a, tunah erawh main draw-ah a hming a lang ta ngei a, Paris-a hmuh ngei inbeisei ang!
Grand Slam title 22 a lak tawh zinga 14 zet hi French Open clay atanga a sualchhuah niin, tarlan tawh angin, kumin hia French Open farewell tournament ni tura ngaih a ni a, Paris grand slam bika mipa singles title la hnem ber a nih mekna hi chhunzawm chungin a chawl thei dawn em tih chu tennis khawvel thlir leh nghah mek a ni.
First round-a a tum tur kum 27 mi Zverev hi tuntuma champion thei tur zinga ngaih langsar pakhat niin, karliamta mai khan French Open inbuatsaihna hnuhnung lam Italian Open-ah a champion a, inrintawkna thuk tak nen Paris-ah bul a tan ngei a rinawm a, hliam avanga a nih thin dan pha lo Nadal lakah hian zum nghal dui tura beisei a ni lo!
Great Britain innghahna lian Andy Murray pawhin veteran ve bawk Stan Wawrinka lakah bul a tan ve bawk dawn.
Kum 37 mi ni ve tawh Murray hian kum 2017 hnu lamah khan tumkhat chiah Roland Garros clay tournament hi a la khel a, Nadal ang bawka chawlh a tum hnaih ve tawh thu a puan hnuah kheimit hliamin a tibuai a, Paris tournament-ah hian a inlan thei dawn em a chiang thei mai bik lo a, main draw-ah hmuh tur a awm ve takah chuan ani pawh hi hmu ngei turah inngai ang!
Defending men’s champion Novak Djokovic chuan ‘pressure’ tlem zawkin bul a tan thei dawn a, a title humhim tura a chetchhuah vawikhatnaah French wildcard Pierre-Hugues Herbert a tum dawn a, second round lut tura ngaih ngheh a ni.
Hmeichhe singles champion lai Iga Swiatek pawhin a zawna he title vawithum lak tlin a tumna kawngah bultanna hautak a hmachhawn dawn lo niin a lang a, he thu buatsaih lai hian a tum tur mihring la chiang lo mah se qualifier emaw lucky loser emaw an ni dawn a, first round paltlang chu chiangsaa ngaih a ni ve bawk.
Season khat chhunga Grand Slam tournament pahnihna French Open hi tun Pathianni, May ni 26 hian khelh tan a ni ang.