Engtin nge boruak thalo i hmachhawn ang

Engtin nge boruak thalo i hmachhawn ang
Kawppui te nena inlaichinna tha tak neih hi thil awlsam tak a ni lem lo, thawhrim a ngai a, dawhtheih te pawh a ngai a, chutiang chu kan peih lo thin. Mihring pangngai kan nih chuan inlaichinnaah inzahtawnna awm se kan ti a, mahse, kan inlaichinna chu chutiang lo lam zawnga a kal a nih chuan kan inpuh tawn a, a nih loh pawhin keimahni mawh emaw kan ti thin a, harsatna thlentu anga inngaihna te nei a, chuvang chuan danglam kan tum a, a nih loh leh kan kawppui te chu an awmdan thlak danglam sak kan tum thin a, chutiang chu kan theih loh chuan kan buai zual telh telh thin.
Engtin nge kan tih tak ang le? Kawppui te nena kan inlaichinnaah hian hlim taka awm reng hi duh lo kan awm lo ang, mahse boruak tha lo a rawn thleng a, chu chuan kan inlaichinna a eichhia a, kaldan tur hrethhiam lovin kan buai phah fo thin. Tun tumah hian relationship lama mithiam tebn kawppui te nena kan inlaichinna a boruak tha lo kan hmachhawn dan tura tha an tih te kan rawn tarlang e.
1. Kan suangtuahna avanga buai mai lovin, a tak tak a ni em tih hriatchian tum thin tur a ni. A duh nge duh lo che tih te kha ngaihtuaha rilru tihhah vak ai chuan, in pahniha inawmdun laia inawm dan zawng zawng te kha chik takin ngaihtuah la, a bula i awm laia nuam i tihdan te, a tihphur theih dan che te kha ngaihtuah teh. Uluk taka i ngaihtuah chuan a duhtu che leh duh lotu che chu hriat hran theih vek a ni.
2. A thim zawnga thil thlir tlat chi an awm thin, chutiang chuan kawppui te nena inlaichinnaah boruak tha lo an tuh awlsam hle. A thim zawnga thil thlir chi ve ve nih phei chuan harsatna hlirin hun hman mai a awlsam dawn hle a ni. Thil reng reng a thatna lam aia a that lohna lam kan hmu lian zawk zel a, kan kawppui te pawh an thatna leh felna aia an tlin lohna leh kan duhthu an sam lohna lai kan hmuh len zawk zel chuan boruak tha kan nei rei thei lo. Chuvangin midang thatna inhmuh sak thiam hi inlaichinna boruak chhe tur venna pawimawh tak pakhat a ni.
3. Inlaichinna boruak tichhe thei pakhat chu inrinhlelhna kan neih thin vang a ni. Thikthu chhiat lutuk vang tein tul lo takin kawppui te kan ringhlel a, chu chuan awlsam tein boruak a tichhe thin. Kan kawppui te rinhlelhna kan nei a nih chuan inenthla leh inchhui ru ang renga khawsa lovin, tha taka sawi dun tur a ni. I kawppuiin i enthla a i chhui ru tih a hriat chhuah chuan inboruak a chhe lehzual ang.
4. Dawhtheihna hi kawppui te nena kan inlaichinna siamtha tura thil pawimawh ber te zinga mi a ni. Dawhtheih leh thinchhiat loh te hi zirtheih a ni. Thinchhiat lutuk te hi inlaichinna tichhe awlsam tu pakhat a ni.
5. Engkimah kawppui te kutah inngah vek loh hi zir tur a ni. Mahni tawka engmah tihleithei lo kan nih hian inlaichinnain a tuar duh khawp mai. Kawppui te buaipui ngai reng mai nih te pawhin inlaichinna boruak a tichhe thei. Chuvangin mahni tawka inenkawl thei tura kan inzir ve deuh a tul thin.