Environment Humhalh Thalaite MawhphurHna

By H. Lalsangliana
Hlimen, Aizawl

Mihringten leilung kan luah chin hi science lama chhuttute chuan kum 20,000 vel kalta atanga kan luah ni awmin an chhut a, a enga pawh chu lo nise Kristianten kan Bible atanga han chhut pawhin kum tam tak Pathianin min din atangin he leilung hi kan lo luah tawh tih hi chu a chiang a. Leilung leh a chhunga awmte chakna ringin tun dinhmun mihringin kan thlenna atan kan environment hian a dawl bak chin kan thlen pui tawh a ni tih hi mawl taka thlir pawhin thudik a ni miau si a, tuna keini tan mai nilo chhuan lo la awm zel turte tan hian tuna thalaite hian a humhalh lam hawiin rilru kan siam a ngai hle a, a tul tak meuh meuh tawh a ni.
Kan khawvel inlumlet zelin hmasawnna tangkai tak tak min thlen rual chiah hian kan environment erawh chuan hliampui a tawrh belh ve zel a. A tel loa kan awm theih loh boruak leh tui kan ti bawlhhlawh nasa em em a, leilung kan sawisa danglam a, thing leh mau kan ti chereu a, nungchate tuallenna kan chhuhsak a, a awmchhun te pawhin an sahimna tur an pan tawk tawk chung pawhin tihhlum tumin kan veh a, chhantu nei ve lo ang maiin an tuar tlawk tlawk mai a nih hi. Pathian thilsiam dangte nena ingheng tawn a nunho hi thang lo thar lehzel tur te tana ziritrtu tha ni turin tuna thalaite koah hian mawhphurhna lian tak a innghat ta a ni.
Environment humhalhna kawngah hian thalaite inrawlh hi duhthusam mai ni lo in, kan koa tla mawhphurhna leh kan tih ngei nei tur zawk a ni. Hma lam hun nghet tak siamna kawng pawimawh tak chu kan chhehvel boruak, leilung leh a chhunga chengte humhalhna kawnga thalaite inhman leh chakna pek hi a ni. Tun dinhmuna thangtharte hi hun lo la kal lehzel tura he ram enkawl a rochun zel turte an nih avangin leh chungte avanga Mizorama thalaite ko harh tur chuan environment movement lian tak mai kum 2022 May thla chho atang khan Youth for Environment Justice Mizoram (YEJM) tih hmangin thalai ten movement an rawn siam chho a. Mizorama environment tihchhiatna liantham tak tak duhlohna leh hemi lam hawia kutthlakna reng reng dodalna rawn kalpuiin protest, silent strike leh street preaching-te hmun hrang hrangah vung takin an rawn kalpui chho a. Tichuan a lian tham ber ni turin Aizawl City College Joint Students Union (ACCJSU) te nen tangkawpin Rally lian tak mai July 19, 2022 khan buatsaihin college hrang hrang leh zirna in danga zirlaite nen Mizorama dan lo a environment tihchhiat mek dodal turin Mizo thalai rual ten kawng an zawh mup mup mai te khan thalai tam tak muthlu a kai harh a, ram hmangaihna thinlung a chawk tho nasa hle bawk a ni. YEJM te beihpuithlakna hian Mizorama thalai ten a ruala environment humhalh kawnga ke an pennaah mellung pawimawh tak phunin rahbi thar a siamsak ngei a tih theih ang.
Khawvel hmun hrang hrangah pawh environment humhalh tura thalaite ke penna, hmuh leh chhiar tur a awm chho reng a, heng thilte hi engvanga lo thleng nge tih chu a chunga kan sawi lan tawh ang khian mawl tein kan environment hian a dawl zawh bak kan thlenpui tawh avang a ni. Hmasawnna kan tih pawh hi awmze nei taka kalpui loh a chet buan buan hi kan tun dinhmun ah hi chuan a finthlak ber lo a, mahni thlan tur lai ang mai chauh kan nihna chen pawh a awm thei tlat tawh a, chuvang chuan kan ram tana tha ber tur ngaihtuah a kan ram roreltute pawh hian hmasawnna hi sum atang ringawta teh lo a kil hrang hrang atanga inhnerem thei ang bera bukna an lo siam thiam pawh a hun tawh hle niin a lang. Tun dinhmun ah hian Mizoram pawh hi ngaihtha takin awmhmunah kuangkuaha awm hle hle thei kan ni tawh lo tih hi sawi ngai loin a langchiang hle mai. Kan sik leh sa inher dana danglamna rawn thleng nasa ta lutuk te, tuihna kang chat nasa lutuk avanga thala kan luipui tui tlem leh khawro nasa lutuk atang ringawt pawh hian thangharh ngei turin ralkhel dar ri khuarel (nature) in min khawn sak ta mawlh mawlh mai a tih theih awm e. Tuna kan kal dana kan kal reng chuan kan hma kum 30 lo kal leh tur hi thangtharte tan chuan huphurhawm tak a ni, chuvang chuan theihtawpa humhalh leh venhim hnathawk tura mahni phak tawk theuhah a lian ber atanga ate ber thlengin humhalh leh venhim hna kan thawh a ngai a, kan damkhawchhuahna tur a nih avangin mahni tuizawng a nih leh nih loh pawh sawi thei kan ni meuh tawh lo a ni.
Kan vei zawng leh kan hriat zawng a nih kher a tul loa, thilsiam dangte nen kan nunhona a kan mawhphurhna leh kan tih ngei ngei tur thil a nih avang zawka kan ngaihven tur thil a ni. Kristianna atang pawhin han thlir ila siamtuin duh taka a duan kan ni a, mihringte hi thilsiamah chuan kan naupang ber a chutih rualin kan mawhphurhna a sang em em, leilung leh a chhunga chengte hmangaiha enkawl tura duan bik kan nihna hlu tak hi hlen ngei tura inzirtirna hi chhawm nung zel ila kan dam khawchhuah theihna tura thilsiam dangte nen kan nunhonaah hian a chhe lai siamthatu leh a chhe zel tur venghimtu kan nih ngei theih nan leh humhalh ngai te kan humhalh a kan venhim hian kan vawiin hun mai ni lo kan tu leh fate tana chenna tlak khawvel nuam kan hnutchhiah dawn tihna a ni. Chumi a nih theihna tur atan chuan chhuan awm mek thalaite hian mawhphurhna sang tak kan nei a, kan nu leh pate leh kan pi leh pute chu che chhuak turin an tha a lo thum tawh a ni thei, thalai kan la nih lai ngei hian kan thatlai hun hman nana duhawm leh ram leh hnam rawngbawl nana kan tih theih hlu tak chu kan environment humhalha venhim leh midangte tihhmuhtu nih hi a ni tih i hre thar theuh ang u.