EPL 2023-24 kan nghak chhuak ta
Football a tualchhung club te inelna zinga ngaihhlut hlawh leh sum tamna ber English Premier League tan a ni leh dawn ta a. Zanin (August 11, 2023 – Zirtawp) zan lai dar 12:30-ah khelh tan a ni dawn a. EPL a kai sang thar Burnley in champion lai Manchester City an mikhual dawn.
Burnley mual Turf Moor-a lenglut tur Manchester City hi EPL 2023-24 ah pawh champion leh tura rinkai ber an ni a. EPL-ah an champion nawn leh thei a nih chuan EPL chanchinah vawi li champion zawn thei hmasa ber an ni ang a, record thar an siam ang. EPL 2023-24 season-a champion tur inrinsiaknaah City hian rin an hlawh viau a, Goal.com leh BBC Sport in champion tura an rin ber an ni ve ve. Player an nei tha a, manager an nei tha bawk nen Pep Guardiola enkawl City hian champion leh turin rin an kai hle.
Player nei thain, an player te inman viau tawh mah se City manager Pep Guardiola chuan season hmasa ang em em chuan an ropui nawn leh theih a ring lova. Trophy lian pathum lak a, treble champion nih phei chu thil theih loh tawp ni hiala a ngaih thu a sawi.
City hmachhawn tur Burnley hi season liam taah Championship-a champion ni a, EPL-a kaisang an ni a. An manager hi City defender ropui Vincent Kompany a ni nghe nghe. Kompany hian a club hlui an mikhual hunah a team te hi point hlawhchhuah pui ngei a tum dawn a. City lakah tlawm an pumpelh thei a nih ngat chuan an tan bul tanna tha chungchuang, duhthusam ang hiala tha a ni ngei ang. Burnley hi kai thar zingah EPL-a inhamtang zui thei tura rin hlawh an ni a. EPL champion City tan meuh pawh zuam sual ve theih an ni ang.
Burnley lakah Manchester City a chakpui thei a nih chuan manager Pep Guardiola hi EPL a team vawi 200 chakpui thei pathumna a ni ang a. Manager ropui Sir Alex Ferguson leh Arsene Wenger te hnung a zui ang. EPL-a manager ropui ber ang hiala ngaih Sir Alex Ferguson khan Manchester United kha EPL-ah vawi 528 zet a chakpui a. Arsenal manager ropui Arsene Wenger khan Gunners hi vawi 476 zet a chakpui ve tawh bawk.
Burnley hian zanina an mikhual Manchester United hi an ngam lo viau a, inelna hrang hranga vawi 11 zet an intum hnuhnungah tlawm zawkah an tang vel a. An intum hnuhnunga an goal thun belhkhawm hi 26-a a ni hial. Heti khawpa an ngam loh lakah point hmu turin a theihna zawng zawng bakah vanneihna an mamawh tel tura ngai a ni.
EPL 2023-24 team hrang hrang
Team Nick Name Stadium Capacity
Arsenal Gunners Emirates Stadium 60,704
Aston Villa Villans Villa Park 42,657
Bournemouth Cherries Dean Court 11,307
Brentford Bees Community Stadium 17,250
Brighton Seagulls Falmer Stadium 31,800
Burnley Clarets Turf Moor 21,944
Chelsea Blues Stamford Bridge 40,343
Crystal Palace Eagles Selhurst Park 25,486
Everton Toffees Goodison Park 39,414
Fulham Cottagers Craven Cottage 29,600
Liverpool Reds Anfield 53,394
Luton Town Hatters Kenilworth Road 10,356
Manchester City Citizens Etihad Stadium 53,400
Manchester United Red Devils Old Trafford 74,310
Newcastle United Magpies St James’ Park 52,305
Nottingham Forest Forest City Ground 30,332
Sheffield United Blades Bramall Lane 32,050
Tottenham Hotspur Spurs TottenhamStadium 62,850
West Ham United Hammers London Stadium 62,500
Wolves Wanderers Molineux Stadium 31,750