Pathianni zan khan EPL a kaisan tur zawnna hnuhnung championship promotion play-off khelh a ni a, inkhel hmuhnawm takah Southampton chuan Leeds United lakah 1-0 in hnehna an chang a, English Premier League-ah an kir leh dawn.
Wembley stadium a inkhel hmuhnawm takah hian Southampton in bul an tan tha a, goal an thun har lo. Inkhel tan atanga minute 24-naah Adam Armstrong chuan Saints hmahruaina goal a thun. Goal thun hmasa zawka an tang hian Saints a fuih phur viau a, EPL-ah kir leh ngei tumin tan an khawh. Inkhel hmuhnawm zui viau mah se goal dang a luh belh thei lo. Hun tawp dawn hnaihah Leeds United in an si phurh an sut teuh viau a, bench atanga lut Dan James chuan goal bar a tih per a, uiawm takin a hun tha neih a chhawr tangkai thei lo. Hun tawp thlenga goal dang a luh belh theih loh vangin Southampton chu EPL 2024-25 khel turin a tling ta a ni.
Play-off final-a intum Southampton leh Leeds United hi EPL 2022-23 season ah EPL atanga tlahniam an ni a. EPL atanga tlahniam pahnih; Leicester City leh Southampton te EPL-ah an kir leh laiin Leeds United erawh an vanduaina thin play-off final-ah an vanduai nawn leh a, EPL-ah an kaisang ve thei ta lo. EPL a kaisan Southampton hi academy nei tha tak mai an ni a, an academy chhuakte chhawr tangkaiin an vawrh lar thiam hle. Hei vang hian Southampton hian ngaihhlut an hlawh viau nghe nghe a, EPL-a an kir leh pawh hi an lawmpui thiam hle hlawm.
EPL a kaisang tur zawnna hnuhnung; play-off final hi football ah match hlu ber ang hiala sawi a ni thin. Final a chak zawk hian khawvela tualchhung league ropui, hautak leh sum tamna ber English Premier League an khel phak a ni satliah ngawt lo va, EPL an khelh vanga an sum dawn tur hi a tlem berah pawh £140m a ni a. A chak zawk tan a hlu em em a ni.
EPL-ah Southampton an kir
Get real time updates directly on you device, subscribe now.
Prev Post