Eptu biala dah vangin ka vui lo – Robert Romawia

MNF hotuten an party tan leh Zoram tan a tangkai theihna tur nia ngaia opposition biala an din tir niin MNF adviser Robert Romawia Royte chuan a sawi.
Hachhek MNF Joint Block Committee buatsaiha Ningania Tuidama campaign khuhhawnnaah he biala MNF official candidate tura puan Robert Romawia chuan an hotuten nasa zawka an party tan leh Zoram tan a tangkai theihna tur nia ngaia opposition biala an dah avangin a vui loa, Pathian leh Hachhek mipui zarah an hotute beiseina tihhlawhtlin tumin theihtawp a chhuah dawn tih a sawi.
“Hachhek bial mipuiin tunhma atang tawha ka lo duhsakna, keima theih ve tawkah theihtawp ka lo chhuah ve thin tih in hria a, he bial tana nasa lehzuala hmasawnna hna thawk turin Aizawl East-II bial nuam tak kalsanin a lo chhuk a ni,” a ti.
Hachhek bial kuhva chingtuten kuhva hralhnaah harsatna an tawk chu pawi a tih thu leh anmahni chhungkua ngei pawh a tuartu an nih ve thu Robert Romawia hian a sawi a. Hachhek Bial Kuhva Chingtu Pawl-ten dan loa kuhva ro phurlut turte man zel a nih theihnan zan duty-na atan zankhatah Rs 15000 zel hisapin kumin chhung chu HBKCP duty puih nan ruahman a ni tih a sawi.