Eptu lam pawmpui lohin stamp duty tihsan pawm

Ram inlei leh hralh, bank-a thil dahkham ang leh thil inpekchhawnnaa dan anga sawrkara chawi ve ngai, stamp duty tihsanna tura rawtna chu Assembly Session neih mekah putluh a ni a, eptu member-te pawmpui lohin pawm a ni.
Finance changtu chief minister Lalduhoma’n state budget thar a pharhnaa sawrkar sum lakluh tihsanna tur zinga a lo sawi tawh stamp duty tihsan tum ruahmanna – ‘The Indian Stamp (Mizoram Amendment) Bill 2024’ chu Ningania Assembly Session-ah Land Revenue & Settlement minister B Lalchhanzova chuan House-ah a pulut a, stamp duty chu ram inlei leh hralh ang chi, bank-a thil dahkham leh tu emaw in midang hnena ram leh thil chesawn thei a peknaa kaltlanga sawrkara sum chawi ngaihnaah stamp duty hi pek thin a ni tih a sawi a. A hmaa 1% lak thinah 3% lak a nih tur thu leh, hmeithai bikah chuan 2.5% lak a ni vek dawn thung tih a sawi a ni.
He bill hi sawiho a ni a, eptu member-te chuan stamp duty tihsan a that rualin, a sanna hi a sang lutuk tih an sawi a, mipui tan phurrit a nih dawn avangin tihhniam deuh an duh a ni. Speaker-in pawmpuina tura ‘voice vote’ a lak hnu ah Bill hi pawm a ni.