Eptuten tuialhthei man tihsan an sawisel nasa

Eptu party-te chuan BJP kaihhruai sorkar laipui chu sorkar hnuaia oil marketing company-ten ni 10 chhunga a vawi li nan petrol leh diesel man an tihsan hnuah an sawi sel a, Delhi-ah petrol litre khat Rs. 102.12 leh diesel Rs. 95.20 a ni tawh.
Congress President Mallikarjun Kharge-a chuan sorkar chu ‘mipui hlawh a tahtawl (installment)a ruksakah’ a puh a, Lok Sabha-a Opposition Leader Rahul Gandhi-a pawhin Prime Minister Narendra Modi chu ‘Inflation Man’ tiin a ko bawk.
“Khawvelah a man a hniam lai khan mipui hnenah hlawkna an thlen lo va, an rawk chhunzawm zel a ni,” tiin Kharge chuan X-ah a tar lang a, a man tihsan chu hnuk kir turin a phut bawk.
Tuialhthei man tihsan nawn fo hi khawvel puma thlitfim loh man sang zel vang a ni a, India-in a lak luh thin hi February khan barrel khat USD 69 vel a nih laiin tunah chuan USD 114 vel a ni tawh a, hei hi Iran buaina leh Strait of Hormuz khar vang a ni.
Tun hnaia tihdanglam a nih hma kum li dawn chu India-ah hian petrol leh diesel man hi a a danglam lo.
Eptu party hrang hranga hruaitute chuan sorkar chu tum nei takin Assam, Kerala, Tamil Nadu leh West Bengal-a assembly inthlan hmaa tipung lovin, a zawh ruala tipung nghal mawlh mawlh niin an sawi.
Gandhi-a chuan X-ah, “Petrol-diesel man hi a tahtawln an tisang a, i pawisa chu zawi zawiin an la reng a. Inthlan a tawp meuh chuan petrol-diesel chu Rs. 8-in a to tawh a, a sang hi a thleng zel dawn chauh bawk. Inflation Man Modi-a hna awmchhun chu hei hi a ni, inthlan laiin a tiam a, a hun dang zawngah chuan mipui beihna a ni,” tiin a tar lang.
Kharge-a chuan kum 2014-a BJP-in thuneihna a chan lai khan Delhi-ah petrol litre khat Rs. 71.41 a ni a, tunah chuan Rs. 102.12 a ni mek a, 43.01% zetin a pung a, diesel pawh Rs. 56.71 atangin Rs. 95.20-ah a kai a, 67.87% zetin a sang tawh niin a sawi.
Modi-a sorkar chuan ‘kum 12 kalta chhungin Rs. vaibelchhe nuai 43 a ru a, ni tin Rs. 1,000 a ru bo’ tiin a puh.
Samajwadi Party chief Akhilesh Yadav-a pawhin May 15 khan X-ah bicycle khalh lai lemziak a tar lang a, “Mi pakhatin hma a sawn a ngai a nih chuan bicycle chauh hi duhthlan tur a ni,” tiin a tar lang tel.
AAP Convenor Arvind Kejriwal-a chuan X-ah, “Tuialhthei man a sang leh ta. Chuti chung chuan Russia leh Iran atangin man tlawm zawk kan la lei lo. Hetiang khawpa Pu Modi-a nawr luihna hi eng nge ni?” a ti.
Kejriwal-a chuan Russia leh Iran atanga tuialhthei leh boruakalhthei man tlawm zawka lei turin sorkar a ngen a, mipuiten tuialhthei indaih lohna leh a man sang zel lak atanga chhanchhuah an mamawh thu a sawi.
Union Parliamentary Affairs Minister Kiren Rijiju-a chuan Asia khawthlanga buaina a chhuah hnuah ram eng emaw zatin petrol leh diesel man chu ‘20% leh 100% vel’ inkara an tihsan laiin, ‘India chuan petrol man 3.2% leh diesel 3.4% chauhvin tihsang a, a la tlem hle’ niin a sawi ve thung.
BJP kaihhruai sorkar laipui chuan Kharge-a leh Gandhi-a ten chhiah khawn zat an tar lan erawh minister hian a la chhang lo.
Tun thla chhunga a punna hi petrol litre khatah Rs. 7.35 leh diesel litre khatah Rs. 7.53 a ni.