EU-in na takin Kyiv-a mi 19 thah leh EU hmunpui beih dem
EU-in na takin Kyiv-a mi 19 thah leh EU hmunpui beih dem
European Union-a Executive Commission hotu, Ursula von der Leyen-i chuan July thla hnua Russia-in Kyiv a beih nat ber tum a thleng chu nasa takin a sawisel a, Ukrainian khawpuia EU palaite hmunpui an kap fuh tel bawk.
Naupang pali telin mi 19 an thi a, mi eng emaw zat hliam an awm bawk niin Ukrainian thuneituten an sawi.
Chhawng ngaa sang mi chenna a chhia a, EU mission leh a bula British Council a chhe nual bawk.
Thuchhuah na tak a siamah von der Leyen-i chuan Russian missile-ten an palaite awmna bul hnai tak a fuh nia sawiin, “Missile pahnihin second 20 chhung lekin palaite awmna atanga metre 50 leka hla a fuh a ni,” a ti.
Ukrainian sipaite chuan Russia hian drone 600 dawn leh ballistic leh cruise missile 30 chuang an kap tih sawiin tun thlaa an khawpui an beih nasa ber tum a ni.
Thi zinga a tel ber hi Kyiv khawpui vei lam, chhimchhaka Darnytskyi district-a mi chenna in chhawng lia sanga mite an ni.
Missile hian Ningani zing dar 03:00 hnu deuhvah fuhin a chim zui.
A chim chhia hi senghawiin chhanchhuah hna thawktuten dam chhuak an zawng zui a. Thuneitute chuan naupang thi zinga pathum chu kum hnih, 14 leh 17 an ni a, naupang hliam dang an awm nual bawk tih an sawi.
von der Leyen-i chuan Russia hi EU-in a thawh 19-na atan hrek tumin inbuatsaih mek a nih thu leh Russia leh an thawhpui, Belarus ramria awm EU member ram pasarihte chu a tlawh dawn tih a sawi bawk.
Commission chuan Zirtawpni khan Latvia leh Finland tlawhin Estonia, Poland, Bulgaria, Lithuania leh Romania-ah a kal leh dawn tih a sawi bawk.
EU thupuangtu chuan eng ram palai hmunpui mah beih tur a ni lo tih sawiin Brussels-a Russian charge d’affaires pawh thil thleng chungchangah hian koh nghal a ni tih a sawi.
European Council President António Costa-a chuan Russia-in beihna a thlen thar chu ‘nunrawnna’ tiin a sawi.
UK pawhin London-a Russian palai, Andrey Kelin-a chu an ram chet dan sawi fiah turin foreign office-ah a ko bawk.
Missile-a nasa taka beih an nih hma, Nilaini khan Russia hian drone hmanga an power hmunpui a tihchhiat avangin Ukrainian chhungkaw 1,00,000 velin power an neih loh lai a ni a. Ningani zinga beihna avang hian Vinnytsia region-a chhungkaw 60,000 velin an neih loh belh phah bawk.