EU leh US hnuah India-in Gulf ram lam a hawi leh

European Union (EU) leh US nena sumdawnnaa inremna lian tak siam a nih hnuah India chuan Gulf Cooperation Council (GCC) nena inremna siam leh turin hma thar a la leh dawn niin Union Commerce Minister Piyush Goyal-a’n a sawi.
GCC hi Gulf region-a ram paruk – Saudi Arabia, UAE, Qatar, Kuwait, Oman leh Bahrain an ni a. India-in hma thar lak a tum mek lai hian Pakistan leh Saudi Arabia hian tun hnaiah inkungkaihna an siam thar bawk.
Union commerce minister chuan free trade agreement (FTA) chuan India leh GCC inkar a tihnai sawt dan niin a sawi.
BJP hruaitu hian GCC ramah hian Indian maktaduai 10 chuang cheng leh hna thawk awmin an ram eibar pawh an chawi kang hle niin a sawi.
“Inremna a awm chuan bungrua, service leh thil dangah nasa zawkin indawrna kan kalpui thei ang a, policy rintlak leh tha zawk a awm ang a, kan rama sum rawn thawh duh pawh an pung ang,” tiin Goyal-a chuan a sawi.
GCC ram paruk zingah hian UAE leh Saudi Arabia hi India-in sumdawnna a kawppui lian ber pahnih an ni.
September, 2025 khan Saudi Arabia leh Pakistan chuan Strategic Mutual Defence Agreement (SMDA) ziakin Islamabad leh Riyadh inkara thawhhona tur lian tak a ni a. Hemi hma lawk hian India leh Pakistan hi ‘Operation Sindoor’ kaihhnawihah an inep na hle nghe nghe.
Hetih lai hian UAE President Sheikh Mohamed bin Zayed Al Nahyan-a’n India a tlawh hnu lawkah Pakistan nena an inremna neih lian tak chu a titawp nghal a. UAE leh Pakistan inkar hi Islamabad-in Saudi Arabia thawhpui tura inremna a siampui hnuah a chhe thar viau bawk.
UAE-in India a pawh thar zual chu Pakistan hian an ngaimawh hle ve bawk a, a bikin Al Nahyan-a’n rei lo te, awmze nei tak sia New Delhi a tlawh kha an duh lo hle a ni.
Al Nahyan-a’n a tlawh chhung khan India leh UAE hian thawhhona tur siamin an inkara sumdawnnaa sum che pawh kum 2032-ah chuan US $ tluklehdingawn 200 tlintir an tum a ni.