Euro 2024 ; England in hma lam an pan

Germany khawpui hrang hranga Euro 2024 khelh mek chu inrinni zan khan quarter-final khelh zawh a ni a, semi-final lut a hriat kim theih tawh. Beisei angin chetha lo mah se England in hma lam an pan zel a, Netherlands hmachhawn turin semi-final an lut. England leh Netherlands an tlang rualin a thlengtu Germany leh Portugal te chu semi-final lut zo lovin an tla ve thung.
Spain 2-1 Germany
Inelna neih meka khel tha pahnih; champion phu Spain leh Germany te chu rin aia hmain an intum a, quarter-final a inkhel hmuhnawm takah Spain in 2-1 a hnehna changin inelna thlengtu an hnawtchhuak.
Spain leh Germany te hi zirtawp zan khan Stuttgart Arena-ah an inhmachhawn a, inkhel hmuhnawm an lantir. Inkhel hmuhnawm takah Spain tan Dani Olmo chuan minute 51-naah hmahruaina goal a thun. Hun rei tak an hnufual hnuin Germany tan bench atanga lut Florian Wirtz chuan minute 89-naah goal thunin an si phurh a sut a, hu pangngaih 1-1 in an inhnehtawk.
Hun pangngaiah an inhnehtawk hnuin extratime-ah goal a lut har hle. Tie-break hmanga thelh an ngai tura ngaih a nih hman laiin minute 119-naah Mikel Merino chuan mawi zetin a tauh goal a, hma an hruai nawn lehna goal a thun. Hun tlem tawh takah Germany hian an si phurh an sut thei lova, Spain lakah tlawmin, Euro 2024 atangin an tla zui ta a ni.
Spain hian World Cup leh Euro quarter-final ah a thlengtu an hmachhawn tumin hnehna an la chang ngai lova, Germany lakah a vawi khat nan an chak ve ta nawlh. Euro-a an champion hmasak ber 1964 khan final-ah champion lai USSR an hneh a. 2008-a an champion tum khan 2004 champion Greece an hneh leh bawk. Euro 2024-ah 2020 champion Italy an hneh leh a, an champion kum a nih hmel viau.
Zirtawp zana inkhel dangah France leh Portugal te chu goal awm lovin an inhnehtawk a. Penalty shoot out ah France in 5-3 a hnehna changin semi-final an lut. France lakah an tlawm vangin Player ropui Cristiano Ronaldo chuan Euro a khelh hnuhnung ber chu goal thun lovin a mangtha.
England an kal zel
Boruak nei lian, player lar tak tak kawl khawmtu England chuan beisei phak lovin, sawisel hlawh bawk thin mah se hma lam an pan zel a, semi-final an lut ta hial. England hian inrinni zana an khingpui Switzerland lakah tlawm an pumpelh hram hnuin penalty shoot-out ah 5-3 in hnehna an chang a, semi-final an lut.
Inelna neih meka team hmuh nawm Switzerland tan hian Breel Embolo chuan minute Breel Embolo 75-naah hmahruaina goal a thun a. England tan Bukayo Saka chuan minute 80-naah goal thunin an s si phurh a sut. Goal dang a luh belh theih loh hnuin England hi tie-break ah an vannei zui ta a ni.
Inrinni zana inkhel dangah Netherands chuan Turkey lakah si an phurh zet hnuin hnehna an chang let a, semi-final an lut ve bawk. Semi-final hi Thawhlehni leh Nilaini zanah khelh a ni ang.

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More