Football hmanga ram inelna ngaihhlut hlawh tak Euro 2024 chu Pathianni zan hian a hmawrbawk a ni dawn a, Spain leh England ten final an khel dawn. Euro 2024 final hi Berlin khawpuia Olympiastadion Berlin-ah zanlai dar 12:30-ah khelh tan a ni ang. Spain in Euro-ah vawi li champion hmasa ber nih an tum dawn a. England in a vawi khat nan Euro-ah champion tumin tan an khawh ve dawn bawk.
Team hmuhnawm Spain
Germany in a thlen Euro 2024-ah Spain hi team hmuhnawm leh khel tha tluang ber an ni a, final an luh thlengin an khingpuite an hneh vek. Final kalkawngah team lian tak tak Croatia, Italy, Germany leh France te an paltlang. Heng team palite hi World Cup champion ni thei khawpa player nei tha em em vek an ni. Football a ram lian, player tha tak tak kawl khawmtu ni bawk mah se team hmuhnawm Spain lakah erawh tui ang an nem zel a, Saipui kal lai an chelh thei lo.
Luis de la Fuente hnuaiah hmuhnawm taka inlan, team boruak nei tha tak Spain hian World Cup 2022-a pathumna Croatia chu 3-0 in an sawp nghal pang a. An match hnihnaah champion lai Italy an hneh zui leh a, khelh hnih atangin last 16 an lut nghal der. Last 16 an luh chian tawh vangin group match hnuhnung berah an player thate an awltir a, an B team in Albania an hmachhawn. Italy in harsa taka an lehthal theih hram leh Croatia pawhin an hneh zawh loh Albania chu an B team in harsa lo takin an hneh a, point 9 hmu chungin last 16 an lut.
Group Stages-ah chak vek awmchhun an nih hnuin last 16-ah Georgia an hmachhawn a, own goal vanga si an phurh hmasak vek hnuin 4-1 ngawtin hnehna an chang let. Quarter-final ah inelna thlengtu leh an mahni ang tho a khel tha Germany an hmachhawn a, inkhel hmuhnawm takah vannei zawkah an tang a, 2-1 a hnehna chang hramin semi-final an lut. Semi-final ah World Cup 2022 finalist France lakah fiahna hautak an hmachhawn zui leh a, 2-1 a hnehna chang lehin final an lut.
Group match an khelh hmasak ber atanga final an luh thlengin Spain hi an khel tha tluang em em a, an hmuhnawm tluanchhuak thak. Ball an thiam em em a, an team boruak a tha viau bawk. Nuamti takin football an khel a, engthawl takin inelna lianah an inlan. Spain rawlthar pahnih; Lamine Yamal te beisei lawk aia thain an chetha a, an hmuhnawm thei hle. Yamal hi a chetla a hmuhnawm theih em vangin Lionel Messi leh Cristiano Ronaldo te hmunruak luahtu tur player ngaihven hlawh bik tur khawvelin a nei thar ta ang hiala ngaih a ni. Spain tihmuhnawm a, tifamkim lehzualtu chu an midfielder ropui Rodri a ni. Rodri hi Spain game tempo vawngtu, mamawh huna solfa vai rang a, mamawh huna solfa vai muangtu a ni. Rodri kawppui fuh tak Pedri inhliam mah se a hmunruak luahtu Dani Olmo a hmuhnawm viau bawk. England hmachhawn tur Spain team hi an fuh vel vek a ni ber mai.
Team tlo England
An media te an chak fal bakah an uchuak ve bawk vangin England player te hi an lar em em vek. An lar chhan hi an media te chak em vang a ni pakhat a, an inkhel hun hi en nuam tawk a nih tel bakah an player te an thiam hrim hrim vang a ni tel bawk. Boruak nei lian England hi beisei angin chetha pup pup lo mah se an tlo riau thung a, final hial an lut. An tlo em vangin Spain lakah chak nawlhin, Euro-ah a vawi khat nan champion theihna hun tha an nei.
England hian Serbia hmachhawnin bul an tan a, Jude Bellingham goal hmangin hnehna an chang. Serbia lakah an chak hnuin Denmark leh Slovenia nen an inhnehtawk a, group stage-ah chak an nei tawh lo. Beisei phak lo takin inlan bawk mah se Group champion an ni tho thung.
Harsa taka group champion an nih hnuin last 16-ah Slokavia an hmachhawn a, an tla teuh hle. Slovakia lakah hian hun rei tak chhung si an phur a, hun pek belh tawp dawn thlengin si an phur. Hun tawp dawn minute khat chauh a awm tawh laiin Jude Bellingham goal ropui hmangin an si phurh an sut a, tlawm an pumpelh. Extratime-ah Harry Kane goal hmangin hnehna an chang a, quarter-final an lut. Quarter-final ah Switzerland lakah si an phurh hmasa leh zet a, Saka goal hmanga tlawm an pumpelh hnuin penalty shootout ah hnehna an chang tehmial. Semi-final ah Netherlands hmachhawnin fiahna hautak an hmachhawn. Football a an tiatpui ram an hmachhawn hmasak berah rinlawk aiin an khel tha tehtlat thung a, 2-1 a hnehna changin final an lut. Final an lut vangin ‘football is coming home’
an ti leh der tawh.
Tarlan tawh angin England player te hi an lar hlawm em em a, position tina mite kan hre em em hlawm vek. EPL player tha ber Phil Foden-a’n goal la thun lo mah se Netherlands lakah England player hmuhnawm ber a ni. Jude Bellingham, Harry Kane leh Bukayo Saka te pawh ball vawi khat an tawh keuh pawha goal thun a, chakpui tham thiau an ni bawk. An buaina ber Declan Rice kawppui tur mi an hmu loh pawh an sukiang tawh a, Manchester United rawlthar Mainoo chu an mamawh chhanna niin, hmuhnawm takin a inlan a, inrintawkna pawh a nei sang viau tawh. Dam chiang lo Luke Shaw a dam chiang ta ngawt pawh hi Three Lions tan chuan thawkhuaina tham a ni.
Head to head
Spain leh England te hi inelna hrang hrangah vawi 27 an inhmachhawn tawh. An pahnih inkara chungnung zawk England in vawi 14 hnehna an chang tawh a, Spain in vawi 10 hnehna changin vawi thum dang an inhnehtawk. An inkhel hnuhnung vawi ngaah vawi hnih ve ve an chak a, vawi khat dang an inhnehtawk bawk.
Final-ah Spain hmuhnawm takin an inlan a, ball chang tam zawk niin England player te an kat kual nasa tura ngaih a ni a, goal pawh an thun a rinawm. Gareth Southgate-a team ten tharum hmachhuanin an khingpuite an nawr nasa hle tura ngaih a ni. Ball chang tlem zawk ni reng mah se hunawl an neih chhawr tangkaiin counter attack ah an innghah a rinawm a. Goal thun hmasa zawkah an tang a nih hlauh chuan an goal venhim tumin tan an khawh ang. Si an phur hmasa a nih chuan Spain in na takin an nawr let ang a, chu chu inkhel tihmuhnawm zualtu a nih a rinawm.
Pathianni zan hi football ngainatute tan men rei zan a ni satliah lo, inkhel hmuhnawm tak en tur awm zan a ni. Zan reiah football in thawm mawi a chhuah ngei ang.
Euro 2024 final – Spain vs England
Get real time updates directly on you device, subscribe now.
Next Post