Euro 2024 thlengtu Germany an kawtkaiah talbuai dawn em?

Tournament thlengtu nih manah a thlengtu ramin qualifying an khelh ve a ngai lo a, hei hi tour-nament-ah an tuar ve chawk thin a, Germany player hlui Dietmar Hamann pawhin chu chiah chu a hlauthawng tih sawiin, an bultanna in-khela Scotland an hma-chhawn hma hian har-satna tam tak paltlang tur an nei tih a sawi.
Germany hi Group A lamah Scotland, Hungary leh Switzerland-te nen awm hoin, nakkum June ni 14 khian Steve Clarke-a enkawl Scot-ho nen Munich khuaa tournament hawnna inkhelah an intum dawn a, he boruakah hian kum riat chhung ram tana game 59 khel tling Ha-mann-a ngaih a tha thei lo a, tournament liana an ram an talbuai leh mai a hlauhthawn thu a auchhuahpui ruai!
England rama club football lo khel tawh Hamann chuan world cup hnuhnung pahnihah first round paltlang loin an tla tih BBC Radio 5 Live Breakfast a hrilh a, “Harsatna lianpui kan tawk a, kumin pawh hian game-a kan chak tawh aiin kan tlawmna a tam leh tawh zawk a; Poland leh Belgium kan hneh lo a, second-string Turkey team laka kan tlawm hnuah Austria kan han hneh lo leh ringawt a, harsatna lian zet zawng kan tawk mek a ni,” a ti.
Hansi Flick chhuah hnuah kum 34 mi lek Bayern Munich head coach hlui Julian Nagelsmann chu Germany boss ni thei naupangber dawttu ni turin kumin September thla mai khan sengluh a ni a, mahse, nakkum Euro finals zawh ruala tawp zui turin contract an ziahpui.
Liverpool leh Manchester City midfielder hlui Hamann chuan Nagelsmann hoa an kal dan turah zawhna a nei a, kum thar Euro-ah hian an chhawr ngei dawn em a chiang lo tih a sawi!
“Nakkum March thla khian match hnih khelh tur kan nei a, Netherlands leh France laka kan tlawm leh ve ve chuan a game hnuhnung palia a team tlawmpuitu manager chu European championship-a team enkawl turin kan chhawr ka ring hauh lo.
“A eng zawng chuan kan thlir tur ani ngei mai a, tun dinhmunah erawh mipui hian an khelh dan leh result puakchhuah avang hian kan national team hi kan chhangkham a ni rih ber a, tun dinhmuna ka sawi theih chu zawhna a tam hle tih hi a ni,” a ti.
Nagelsmann thlak thei hnaivai tura a ngaih an zawhna chhangin Hamann chuan, “Idea ka nei mai rih lo. Rudi Voller khan France lakah game khat lek team a enkawl a, khati ang tluk thuak boruak kha tawnbuak theih a ni a, tun thla 12-18 liamta chhunga kan chet dan enin tu emaw chuan an thlak thei dawn niin a lang.
“(Louis) Van Gaal hi he chona hmachhawn tur hian a inpeih mai ka ring a, foreign manager dangte pawh an awm a rinawm a, a chhan pawh tunhnai kum li nga liamta chhung hian kan national team ke pen a buai tlat a, pawn lam atanga thlirna nei thiam tu emaw kan rawih mai loh chuan kan chhe zui zel ang tih a hlauhawm.
“Keimahni hi tha ber-ah kan inngai a, a ni teuh si lo a; ram dangte hi kan en chuan min pel duai tawh niin ka hria a, nakkum March thlaa kan hun tawn tur leh he huna thil thleng tur hi a interesting takzet a ni,” tiin Euro khelh tan hma ngeia coaching staff inthlak leh burh boruak awm thei chungchang Bayern Mu-nich leh Newcastle United defensive midfielder hlui hian a tarlang tel.
Bultannaa Scotland an hmachhawn tur chung-changah Hamann-a chuan team tha lutuk an nih thu leh an boss Steve Clarke pawh a hriat mi a nih thu sawiin, Newcastle thuam a inbel ve lai khan Ruud Gullit-a hnuaia assistant manager a lo nih tawh thu a sawi a, chutiang coach ropui hoa inlan tur team chu ngaihnep theih an nih loh thu a sawi uar hle.
“Scotland a enkawl kawngah a thawk tha khawp mai a, Spain hial an hneh maw le. Away lehnghala Spain an hmachhawn lai kha ka en ve a, an goal thun pakhat pawmsak ni ta lo pawh kha goal-a pawm ngei tur a ni. Kan insut hun hian an tawh a khirh dawn a, Munich khaw opening match-ah hian kan nasa lo viau mai thei.”