Lalchhandama Colney
Chaltlang Lily Veng,Aizawl,
Ph – 9862982321
-- Advertisement --
A lo her chhuak leh dawn ta, kan nghahfak Krismas. Mi tin maite mahni tawk theuhah kan buai thin in, kan hah thin hle mai. Kan ram hruaitu tur thlanna kan han nei bawk nen. Kum kalta lamah lah hri vangin kan hmang hlei thei lo bawk nen. Mipuiten duh ber thlangin vote kan thlak a, tling zo ve ta lote chu an vanduai kan ti dawn nge, mipuiten kan duh lo aw. Kan thlan tlin takte ho pawh chu kan duhthusam an ni chiah em, nge, thlan tur dang an awm chuang lo. Tun kum chu kum tluan deuh thaw maiin inthlan tur kan buaipui a ni deuh ber mai e. Tunah chuan Pathian zarah kan zo fel ta a, chung kan buaina zawng zawngte chu dah tha in, hun hlimawm leh ropui tak kan hma lawk a lo thleng tur lam hawiin i han insiam tan teh ang u.
Hetih lai hian lusun chhungte tan erawh ngaihtuahna thar neih a har hle mai thei. Kan thupui lam hawi hian han her rem chhoh zel kan tum ang a, mahni theuh inen nan hman kan tum tlang dawn nia.
Kan Dinhmun – Chanchinbu, TV, Radio, etc., a chanchinthar ngaithla thinte chuan ni tin, zan tina kan hriat tam ber chu innghirnghona, indona, firfiakte chetna rapthlak tak tak te a ni. Khawvel ram hruaitute auhla leh buaipui ber chu remna leh muanna vawiin thlengin a la ni reng a ni. Keini ramah pawh inngeih taka kan awm tlan theih nan, dan leh dun tha tak tak leh policy tha tak tak te kan nei thin a ni. Theih tawpa an buaipui chung pawhin chanchin duhawm lo tak tak hriat tur a tam tthin hle tho a nih hi. A bik takin Assam nen te pawh kan han buai em em a, a aia nasa leh rapthlak zawk em em, Manipur tualchhung buaina alo awm leh a, inremna a awm thei lo. Hetih lai hian Mizote erawh kan ralmuang viau mai, buaina lian, harsatna sawi tur em em kan nei hrih lo. A lang lama kan neih loh lai hian kohhrana rawng kan bawlhona, khawtlang leh chhungkuaah te erawh eng nge kan dinhmun hi aw, khakna leh elrelna, huphurhna, etc., te hian kan hriat loh lai hian min lo chenchilh reng lo maw, i fel hle mai, i ti tha lutuk, kan intih rual hian kan chhungril lamah erawh chuan kan inkawk si lo maw.
Remna Lal – Bible-a kan hmuh dan chuan Evi leh Adama chu Eden huanah an awm a, Pathian nen an leng dun thin a ni. Pathiante ang taka siam kan ni a, chatuan mi kan ni. Amah ang taka siam kan nih avangin ngaihtuahna thiang tak kan nei a, duh zawng thlang thei, duhthlan theihna, zalenna min pe a, hei hi Pathian thu zirmite sawi dan chuan, Pathian hian min zahsak hle nghe nghe a ni, an ti. Hun rei lo teah thil a kal buai zo ta, mihringte chu sualah kan lo tlu ta reng mai, anchhe dawng kan lo ni ta a, keimahni avangin khawvel leh a chhunga cheng zawng zawngte chu anchhe dawng an lo ni ta. Hetih lai hian Pathian chuan nasa takin min la hmangaih reng tho a, thuthlung hlui lamah khan inrem leh theih dan tur chi hrang hrang a han tar lang a ni. Mahse, inremna tak tak a awm thei tawh lo, rei a daih thei lo, tihngaihna tak tak a awm thei tawh lo. Hetih lai hian sual leh bawlhhlawh kai lo Pathian fapa Isua chu a lo lang ta, hei zet chu Pathian thinurna zawng zawng tikiangtu, remna siamtu a lo ni ta. He remna kan thinlung atanga lo intan hian chhungkua, khawtlang, ram thlengin a huam vek a ni, a mamawh leh sawmtu apiang tan a ni e.
Eng Tin Nge Ni Ang?: – Engtin nge remna leh muanna chu kan neih theih ang le? In office-a in pu chu i chungah a thinur hle a, engtin nge i tih ang le? A nih loh paw’n supply hna i duh ve si a, a tihsak duh miah si lo che a, eng tin nge i tih ang le. A chhannaah chuan in pu lungawi lo tak hnenah chuan, a rin loh deuhin an inah va kal la, “Kan ar in hi a chep ta deuh a, khawngaihin, hei, a tui lai pakhat hi lo la mai teh, a buaithlak tlat mai,” emaw han ti la; kei chu, mai-an bai ringawt ai chuan a chaw ei a tih tui ka ring tlat. |henawmte nen ramri chungchangah buaina kan nei a, roreltute chuan theih ang tawkin remna an siam a, mahse, lungawi tak tak erawh a har thin a nih hi. Nu leh pate pawh kan inngeih lo a, chhungkua kan buai a, min han chalrem thin tak mah se, a hahthlak si thin a nih hi. Chutiang zelin veng leh veng, khua, ram thlengin. Inremna thuthlung tha tak tak, pawmawm tak tak, man to tak tak te kan siam a, kan buatsaih a, mahse, rei a daih thin si lo; Bible-te pawh kan chhiar nasa. A nih leh eng tin nge ni ta ang le? Heng kan duhna, inbuatsaihnate tihlawhtling thei tur chuan tinungtu (Thlarau thianghlim) a tel a ngai, chu chuan engkim a si thlu vek thei a ni.
Remna lal chu Isua, mi piangthar chu ka ni, kan han ti ve thin tak na a, tum thum, tum li lai te, mi hnenah mi lo rel fo tawh chuan, ngaihdamna thinlung put chu a har duh khawp mai. I pawisa batuten an tlanbosan daih che chuan i rilru chu a lunghnur ve duh khawp ang. Aw le, mihring, mihrinna atang chuan inremna, ngaihdamnate hi a awm duh lo khawp mai, a awm a nih leh chin deuh a awm thin, a daih rei lo thin. Hmm,..ni tam a awm ta lo, remna lal a lo piang dawn e, lungngai suh, i buaina, hahna, phurrit, chhawk zangkhaitu tur che mi tin tan a ni a, mi tu pawh tan a ni a, thilsiam zawng zawng tan pawh a ni. Sawm bik a nei lo a, tih bik a nei lo a, a duh apiang tan a ni. Beramputen chibai an buk lai kha ngun takin ngaihtuah la, khawchhak mifingte pawh kha ngaihtuah tel la, a lang lam aiin kan thinlung tak taka chibai kan buk ve hi a lawm zawng a va ni dawn teh lul em! Krismas chibai le.