Euro 2024 thlir tinuamah…

Zanin hi Europe ram mipate football-a inelna sang ber European Championship tan zan a lo ni ta a, inkhel en tinuamah group then dan, khelmual leh fixture bakah a behbawm thenkhat kan han chhawpchhuak e.
Defending champion Italy chu Group B-ah team khawng dang Spain, Croatia leh Albania-te nen an awmho a, an title kawl lai hum zo tak ang maw?
Gareth Southgate-a team Three Lions hi silverware thlahlel na ve tawh tak mai an ni a, trophy hawn lo zawng bawkin an tawp leh dawn em kan thlir ang!
Zanin hian Bayern Munich khelmual Allianz Arena-ah tournament match hmasaber chu a thlengtu Germany leh Scotland-in an khel dawn a; thla khat zet awh tur niin, July ni 14, Pathianni zan khian Berlin khawpuia Olympiastadion-ah a hmawr an bawk dawn a ni.
Tun hi Germany ram insuihfin leh hnua he tournament an thlen vawikhatna tur niin, kum 1988 khan West Germany hming puin an lo thleng tawh.
Champion tura rinkai zingah pawisa thaptute chuan England leh France (4/1 ve ve) bakah Germany (7/1) lamah pawisa an dah huai a; anni dawtah Spain (8/1) awmin, Scotland (80/1) ringtute chu an chau angreng viau!
Qualifying khelh laia tlawm pumpelh team paruk – France, England, Portugal, Belgium, Romania leh Hungary tihte zingah hian an khelh apiang hneh fai vek awmchhun Portugal-in goal 36 khungin goal hnih chiah an chhuah a, Cristiano Ronaldo hote hi dahhniam chi an ni bik lo ang!
Norway an qualify loh avangin Manchester City forward Erling Haaland leh Arsenal captain Martin Odegaard-te chu player tel lo tur langsar pahnih niin, a ram zawngah chuan kum 1996 hnu lama a vawikhatna’na tling zo ta lo Sweden an langsar ve thung.