Euro 2024 thunawi
Europe khawmualpui ramte football intihsiakna ropui tak kal mek chu June ni 18, 2024 zan khan group stage first match-ho (league points) khelh zawh a lo ni ta a, nizan atang khan second league match khelh tan leh a ni.
He 2nd league match-ah hian 1st group match lama point la hmu ve lo (a biktakin ‘lost’)-hote phei kha chu knock-out stage an thlen ve theihna’n theihpalingkawh/aikawtawptana an tan a ngai tawh dawn a ni.
He 2nd league match-a an la tlawm nawn leh fo chuan an tan hope a awm tawh lo ang a, 3rd league match khelh hun tur thahnemngai taka an nghahchhuah hnuah puanthuah tela inlam input haw a ni tawh mai!
Khelh vawikhatnaa chaka point thum hmu ho zawngte kha chu ‘knock-out phase’ luhna’n an tan kawl a eng tan nghal a, league match vawihninaa an chak leh phei chuan point 6 hmuin third league match-ah group champion (point 9) hmu turin phur taka an lo nghah a ngai ve thung ang.
Amaherawhchu, khelh vawihnihnaa an lost vaih chuan third league match-a chak ngei ngei an ngai tawh thin a, draw an hmuh erawh chuan an thenawm (group-puite) point hmuh dan atangin knockout-a an inhlankai leh hlankai loh a hril ve chauh ang.
Khelh vawikhatnaa ‘draw’ hmua point khat chauh la hmute tan hian second league match-a chak hi a pawimawh khawp mai; point 4 hmuin third league match-ah ‘dau’ a la en theih a, draw an la hmu fo a nih chuan last league match-ah aikawtawpa tan a ngai tho dawn.
Comments on Euro
Euro kal mekah hian Fifa world ranking-a palina ni lai Belgium chu world number 48-na daih luahtu Slovakia lakah an tlawm a, sikhat faia Belgian-ho tlawmna khan thlirtu mipui (a bikin Belgium fans) min barakhaih nasa hle!
Belgium chuan nasa taka rawn fight back-in an thiampuipa Lukaku’n goal mawi zet maia vawihnih lai a thunte chu VAR-in a hnawlsak ve ve tlat avangin a tawp thlengin an thun belh theih tawh lo a nih kha.
Slovakia hi kum 199 bawr lai vela nasa taka Europe ram a kehchhiat laia Czechoslovakia kehphel khing lehlam kha a ni.
An kehdarh hma Czechoslovakia an nih lai atang tawh renga football pet thiam ram an lo ni ve sa hrim hrim a; sulhnu pawh an nei hraw ve khawp mai a, Euro-ah hian 1976 kum khan German-ho hnehin an lo champion tawh a, 1996 kum erawh kha chuan Czech Republic ni tawhin, Euro-ah hian runners-up an la ni pha cheu a ni.
Czechoslovakia hminga World Cup an khelh hnuhnun ber chu Italy-in kum 1990-a a thlen tum kha niin, quarter-final an thleng leh bawk!
Slovakia hming erawh chuan kum 2016 khan an qualify ve tan chauh a, chuti chungin round of 16 an thleng pha.
Czechoslovakia an nih lai hian World Cup 1934 & 1962 kumte khan runners-up an lo ni tawh bawk.
An khingphel Czech Republic (tunah chuan Czechzia an ti tawh)-te pawhin kum 2016 champion Portugal chu an surprise ve thei tlat mai!
Portugal hian ball possession 74% zet hauhin hneh zawk mah se goal an thun thei thlawt lo! A chhan chu Portugal-ho khan crossing ball-a an forward-ho (striker) head goal tur hlirin ball an pe (supply) a, Czech defender-te chu an dung a san zawk avangin Portuguese hmatawngte khan an thelh ngun hle.
Ronaldo’n na fahrana a head chu Czech keeper-in rang fahranin a lo dang a, rebound ball chu tauhlut zui tho mah se VAR check avangin hnawlsakin a awm tlat a nih kha!
A tawp dawn hnaihah Czech-ho ‘own goal’ leh substitute Conceco chhuihluh nen 2-1-in Ronaldo & Coy. an chak ta tawk a nih kha…
COMMENTS:
Tun tum Euro chu player-hoin mawi tak taka goal an thunte VAR check vanga goal-a an pawm leh loh (disallowed goal) engemawzat a awm tawh a, chu chuan goal thuntu leh a team/fansa tilunghnur thei hle mai!
Scoreboard enkawtute pawhin (eg:1-0) an rawn tarlan tawh hnua ‘goal leh lo’ tih vel kha naupan laia rual-ute nena ball kan pet a, kan goal thun hnu goal leh lo tia min hnawlsak tuma kan hnial ngam si lo thin kha min hriatchhuahtir rum rum alawm maw le!!
Lukaku-a’n mawi zeta goal hnih a thun an hnawlsak behchhan khan tunlaia football dan thenkhat han bihchiang zuai zuai dawn ila:
1. Semi Automated Offside (SAO)
Hemi offence hi kan taksa pum chanve, ke, kut, ban, kiu etc. thlengin offside-trap ah lo awm hlek se offside-a puan vek a ni tawh. Hei hi World Cup-a VAR hman a nih hnu khan an uar lehzual!
Kum 2018 World Cup hma kha chuan SAO hi lo awm tawh mah se linesman-te’n chiang taka an hmuh vek sen loh avangin taksa pum (whole body) hlawm tawp offside chauh an la thin.
2. Ill-gotten ball (igb):
Ball kan dawn (receive) reng rengte hi kan opponent-te kan foul khum atanga kan dawn emaw ball min pass-tu’n kan opponent-te a foul khum emaw handball atanga min pass kan dawnsawnte kha ‘ill-gtotten ball’ an tih chu a ni.
Lukaku rawn pass-tupa khan a kuta ball a khawih hnu kha Lukaku tan a pe phei a, Belgium miang forward khan a lo receive hnuah goal a thun zui a, mahse, endik a nih hnuah hnawlsak (reject)a ni.
VAR awm hi a tangkai viau na a, football game a tibuarchuar ve tlat. A chhan chu infringement emaw goal emaw a awm hnu daih, goal pawh an lawm fel diam tawh hnuah VAR atangin complain a lo awm a, ball play tihchah a ni a, referee-in VAR decision a va check tha leh te te a, chutah goal leh lovin a rawn puang leh hnuhnawh a, infringement a pek leh tihte hian FIFA Laws of The Game a tibuarchuar hle.
A chan chu VAR-in decision a lak tawh hnu screen-a lo lang referee-in a va check leh kha hnial (oppose) a mawi tawh si lo, VAR leh referee-te kha combination inrual lo tih leh kha a mawi si lo.
VAR hi international taka hman a nih hun chu kum 2016 September thlaa France vs Italy international friendly kha a ni a, tin, Netherlands rama KNVB Cup Tie-a Willem vs Ajax inkhelhnaah an lo hmang chhin tawh bawk. FIFA-in World Cup 2018 khan official taka hman turin a rawn puang ta a ni.
VAR awm hma kha chuan ‘slow motion replay’ hi an hmang ber thin a, mahse, slow motion replay aiin assistant referee I & II-te thuneihna a sang zawk a, slow motion replay decision referee-in a lak hmain assistant referee-te a va zawt (approach) phawt thin (eg. 2006 World Cup final Zidane headbutt Matterrezzi)
-- Advertisement --
Awm zel tur…