Rinkai Portugal an chak

Team ngaihven hlawh Portugal chuan thawhleh zan khan Czech Republic hmachhawnin Euro 2024 bul an tan a, hun tawp dawn tepa rawlthar Francisco Conceição goal thun hmangin hnehna an chang. Czech Republic lakah hian Cristiano Ronaldo chuan captain ban hren hreng chungin inkhel a hmachhawn a, Euro ecord thar a siam. Thawhleh zana inkhel hmuhnawm takah Turkey chuan Georgia an hneh ve bawk.
Champion tura rinkai zinga mi Portugal hian Leipzig Stadium-ah Czech republic an hmachhawn. He inkhelah hian veteran defender Pepe chuan Portugal tan bul a tan. Kum 41 leh ni 113 a upa Pepe hi Euroa khel thei upa ber a ni a, record thar a siam. Portugal Captain Cristiano Ronaldo chuan Euro vawi ruk zet a hmachhawn tling a, Euro-ah vawiruk inlan thei hmasa ber record a siam ve bawk. Record pahnih an siam zanah point thum an hmu zo lo teuh viau thung.
Czech Republic hian an khingpuite an hlauhawm tih hriain ruahmanna tha tak an nei a, Ronaldo an veng uluk hle. Mual sir lam atanga ball an vawrh luh a hlauhawm thin tih an hriat a, ball vawrh lut lo turin an khingpuite an veng nasa hle. He an tumah hian hun rei tak chhung an hlauhawhtling a, bet zawk ah tang reng mah se awmze nei tak nawr letin, goal thun hmasa zawkah an tang ta hial nghe nghe a ni.
Portugal in na taka an nawr karah Czech Republic an him hram hram zel a, Cristiano Ronaldo an dang zo lo teuh thin hle. Ball chang tlem zawk niin, bet reng mah se an hun tha neih an chhawr tangkai a, goal thun hmasa zawkah an tang. Fuh taka an nawr tlang hnuin Lukás Provod chuan minute 62-naah hmahruaina goal a thun a, 2016 champion Portugal an barakhaih.
Goal thun hmasa zawkah an tan vangin nasa zawkin an goal an veng thei a, Portugal thin an tiphu rang hman hle nghe nghe. Roberto Martinez team te hian na taka an khingpuite an nawr rah an seng a, goal an thawkchhuak ta nge nge. Minute 69-naah Czech Republic player Robin Hranác chuan an lamah a ti-goal palh a, Portugal si phurh a sut sak.
1-1 a nih hnuin inkhel a hmuhnawm leh zual a, goal thun tuma Portugal tan khawh a hmuhnawm thei hle. Hun pangngai tawp thlenga goal dang a luh belh theih loh vangin chak zawk an awm thei lo tura ngaih a ni hman. Hun tawp dawn hnaihah Portugal an che fuh a, hmahruai letna goal an thun. Bench atanga lut Francisco Conceição chuan minute 90+2-ah goal pawimawh zet a thun a, Portugal a chakpui.
Portugal chakna goal thuntu Francisco Conceição kha Portugal player hlui Sérgio Conceição fapa a ni a. Sérgio Conceição leh Cristiaono Ronaldo hi Euro 2004-ah khan an khel tlang hman hial a. Kum 20 a liam leh meuh chuan a fapa Francisco Conceição chuan Cristiano Ronaldo bula khelin, Portugal chakna goal a thun ta hial a ni. He inkhelah hian goal thun lo mah se Cristiano Ronaldo a khel chhe lem lo viau a, ball pass dik 100% a nei nghe nghe a ni.