Euro 2024 thunawi
(Lukaku’n EURO record a break)
– Jipson S. Hrangate, AFC Referee
EURO 2024 beihpui thlakna chu Group match vawihnihna khelh zawh a lo ni ta a, heta tang hian team pathum (Germany, Spain & Portugal)-te chauh hi vawihnih khelna a chak zawma point ruk hmu tawh, solid point 9 (group champion) beiseiawm an ni ta mai a, team dang zawng (21)-te hi chu 3rd league match-a a siruk laa tan la thar te te-a ‘win’ leh ‘draw’ hmu emaw team dangte tihthat/tihsual zarzova knock-out stage-a inhamkaithei chauh tur an ni dawn hlawm a ni.
Tun tum Euro chu group tinin point an hmu chhe hlawm ang reng khawp mai.
Group E (Bel, Slo, Rom & Ukr)-ho hian league match vawihnihna thleng pawhin point thum theuh an la hmu teng mai! Mahse, vawiin thleng hian Euro-a group khata team palite’na pint inang vek an hmuh hi a la awm ngai zen zen loh avangin ‘Euro record’ an break ve tlats!
3rd league match-ah chuan a sirukla/aikawtawp tana an tan theuh a ngaih dawn avangin an hmunawmawm biah biah ang chu! Mahse, an ‘in draw’ vek chuan Belgium leh Romania chu GD-in an kai hlauh thung ang.
EURO COMMENTS
Tun tum Euro chu player-hoin goal mawi tak taka an score a , an lawm (jubilant) zawh hnua VAR check vanga goal an pawm leh loh (rejected/disallowed goal) engemawzat zet a awm tawh a, chu’ng zingah chuan Lukaku hian a la tuar nasa ber a, EURO record thar a break chiang hle!
Euro awm tawh zawngah (World Cup pawh a ni hial ang) player pakhatin goal vawithum zet a thun hnawlsak hi a la awm ngai lo ti ila kan sawi sual awm lo e.
Amah (Lukaku) pawh a inthlahrung tawh ang a, a puanthuah tel lawka in lama haw daih a duh tawh hial ang!
FIFA Laws of the Game-te zinga No.11-na ‘Offside Offence’ an tihah hian dan siper/kaupeng a tam ber a, a har ber bawk.
International, national leh local tournament etc. ahte pawh hian kan buai tam/ngun berna pawh offside chungchang hi a ni.
A dan a inthlakthlengin dan thar an siam belh ngun bawk si nen, VAR lo awm hma phei kha chuan linesman-te an hah thin reng a ni.
A vaiin kan sawi seng lo ang a, tun Euro-a thlengte bik han sawi phawt ila :-
1. Netherlands leh France inkhelh tuma Netherlands jersey number 10 hatu Depay-a’n French-ho 18 yards box chhunga minus ball-in jersey number 7 (Xavi) a pass a, a straight shot goal khan Netherlands jersey number 22 (Dumfires) kha ball khawih kher lo mah se a offside tho; slo inhambuai ve chhen avangin leh France keeper a disturb avangin. Khatiang decision kha ‘interfering in the play’ a ni. Dumfires kha hmun dang deuhah che lovin lo awm hle hle se a offside lo tur…
2. Portugal vs Turkey inkhela Portugal goal thumna incident: Ronaldo kha ball a receive hmain offside trap-ah lo awm pawh ni mah se ball kha Turkey player atanga a dawn (receive) a nih vangin ‘opponent last touch not offside’ decision hmangin a offside ta lo tlat.
Hemi dan hi offside position-a lo awmsa player-te tan goal score chance ropui tak ni mah se opponent last touch hun nghaka offside-a lova awm reng kha phal a ni chuang lo, tihpalh thil (by-chance)-ah chauh phal a ni.
Third league match zawng zawngte hi group tina team-te’n timing inangin an khel theuh tawh dawn a, a chhan chu tu team mahin team dangte point an khilai theih lohna’n a ni.
3rd league match zawhah kimchang taka thlirlet turin inhmuh leh kan tum dawn nia…