Euro 2028

Euro 2024 khelh zawh ruala zawhna awm nghal chu Euro hi engtikah nge khelh leh a nih dawn a, khawi hmunah nge khelh a nih dawn tih hi a ni. Euro hi kum li dana khelh thin a ni a, rokhawlhna dang a awm loh chuan kum 2028-ah khelh a ni leh ang a. Khelh hun atan hian June ni 9 atanga July ni 9 thleng ruahman a ni a, a ni hi chu thlak danglam leh theih a la ni thung. United Kingdom in a huam ram panga; England, Scotland, Wales, Northern Ireland leh Republic of Ireland ten an inthlen tawm dawn.
Euro 2028 thlengtu langsar ber chu England a ni dawn a, Wembley Stadium-ah final khelh tura ruahman a ni. England hi Euro final-ah an tlawm zawn a. Euro 2028-ah hian an tualzawlah ngei champion tumin tan an khawh leh dawn a, boruak an nei lian leh hle tura ngaih a ni.
Euro-ah hian a thlengtu ramte inelna hmachhawn turin an tling nghal mai thin a, Euro 2028-ah erawh ram panga ten an inthlen tawm dawn vangin buaina a awm thei thung. Euro 2020 kha ram hrang hrang 12 ngawtin an inthlen tawm vangin a thlengtu ram nih vanga tling lawk an awm lo. UEFA danah chuan Euro-ah hian a thlengtu ram pahnih chin bak chu inelna hmachhawn tura tling lawk a awm theih loh. Hetiang a nih vang hian Euro 2028 hi ram panga ngawtin an thleng dawn si a, a thlengtu ram nih vanga tling lawk an awm dawn em tih a la chiang lova, UEFA rorel ngaihchan mek a ni. Ruahman dan chuan Euro 2028 thleng tur ram pangate hian Euro 2028 qualifier an hmachhawn vek phawt ang a. Inelna thleng tur ram zingah inelna hmachhawn tura tling phak lote tan a thlengtu nihna anga inelna lian khelh theihna remchang siamsak tum a ni.
Euro 2028-ah hian ram 24 bawkin inelna an hmachhawn dawn a, inelna hmachhawn tur zawnna erawh tih danglam hret a ni dawn thung. Europe-a ram 55 zette chu Euro 2028 khel tur zawnnaah group 12-ah ram pali emaw panga in emaw then an ni tawh dawn. Euro 2028 khel tur zawnna hi November 2027 atangin neih tan a ni ang.