Euro-ah captain chauhin referee an dawr thei dawn!

Euro-ah captain chauhin referee an dawr thei dawn!
Hei hi Uefa duhdan a ni a, Euro 2024 khel tur team tin hnenah he mi chungchang hriattirna a tichhuak tawh nghe nghe.
Inkhel boruak sang deuha player-te’n referee an hual tuau tuau thin leh a ka kaw na zawngin inkhel hamtu an hauh rawn luai luai ang kha a bo theihna’n kumin European Championship-ah hian team tin captain tih loh player dang zawng chu inkhelh laia thutlukna behchhana referee dawr ngaiah an hmui phuarsak vek ni se tiin European football thuneitu sang ber Uefa chuan a duhdan a tarchhuak a, captain ni loin referee thutlukna an lo sawibuai ve sek a nih chuan card pek theih dinhmuna an din tur thu team tinte hi hriattir an ni!
Uefa thuchhuah chuan hei hi player rualin referee thutlukna sawisela an zimbuai fo tihtawpna hmanrua leh football hlimthla chhe tak hmuh tur awm thin thaibona tur a nih thu an sawi.
Uefa managing director of refereeing Roberto Rosetti chuan, “Uefa chuan Uefa Euro 2024 tournament-ah hian referee-te chu team tinte hnena an thutlukna siam dan leh siam chhan tunhma aia kimchanga hrilhfiah turin a duh a, a hrilh dan tur erawh player nazawng hnena sawi loin team tin captain theuhte bulah chauh sawi tura hrilhhriat an ni.
“Captain tinte chu referee thutlukna sawisel tur emaw zawtfiah tur emawin referee an bawhbuai tur a ni lo tih hriattir an ni ve nghal a, referee leh captain-te indawr fel nalh mai hi a felfaiin, a zahawm hle dawn a ni,” a ti.
Uefa hian football dan siamtu (lawmakers) International Football Association Board (Ifab) ruahmanna zulzuia he thutlukna hi siam a ni a; Ifab chuan thutlukna inchuhbuai leh sawisel ngai boruak ang chi-ah reng reng team captain-te chauhin referee an biakpawh theihna dan hi kumin kumtir lam khan a lo enchhin tawh a ni.
Uefa referee hotupa Rosetti chuan sawizawmin, “Team tina an captain leh referee indawrna duh tawk loa referee zahlohna lamhawi emaw referee laka nungchang mawi lo lantir emaw reng reng chu yellow card hmanga thunun tur an ni.
“Captain chu goalkeeper a ni thei a, goal-veng tana referee dawr tura lehlam pawl goal bula va tlanchhuah fo te chu remchang lo thei a ni a, an duh chuan chutiang captain nei team-te chuan referee dawr kawnga captain hna chelh turin outfield player an ruat thei ang.”
Tarlan tawh thin angin, kan hma lawka khelh tur Euro 2024 hi Germany rama nghah niin, June ni 14, Zirtawpniah a thlengtu team leh Scotland-in match hmasaber an khel ang.

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More