James Chhakchhuak
-- Advertisement --
Mizo hi hnam tlem tak leh hnam naupang tak, awlsam taka chimral mai theih dinhmun a ding mek chauh kan la ni a.
Hmasawnna zawng zawng hi neih vek tha viaua a lan laiin, kan hnam dinhmunin a zo em tih hi ngunthluk leh bengsik, fimkhur taka kan ngaihtuah a ngai hmasa a. Hmasawnna chak tak kan duh rual hian, Mizoram tun dinhmunah chuan, kan hnam hi chimrala kan awm loh nan, venhim ngai kan la ni tih hi tuna Mizote dinhmun diktak a la ni. Hnial theih a ni lo. Thudik hlang hlak a ni.
Christopher Colombus-a’n America a explore khan, Red Indian kan tih mai ho kha, hnam mawl tak an la ni a. Hmasawnna kha a zuanin a zuang tihngam a ni a. A story sawi zui ta duah lo i la. America-ah khuan Red Indian an cheng ve thin tih hi tuna khawvelin kan hriat dan a lo ni ta chauh a ni.
Kawng tinrenga mahni la intodelh lo. Kutkawih mumal hnam anga innghah ngamna la nei lo. ILP vanga engemawchen la him hram hram. Chu pawh kan tun dinhmunah Mizorama sumdawnna lian zawng zawng pawh Vaiho control-na hnuaia awm tawh kan nih mek lai hian, eizawnna kawngah pawh hnam anga la mature lo em em Mizoram hi, Rail Kawngpui lian zawkin Hmawngbuchhuah thlenga min explore chuan, Mizoram chhunga Mizote sumdawnna tam ber hi a tawp titih nghal dawn tih kan chhut thleng phak tel bawk tur a ni ang.
Humhalh chung pawha humhalh sen lek lova Lalna leh thuneihnaa tuihal kan ram hruaitute vanga kan ram zimte chhungah ngei Chakma District Council chen a neihtir thei. Tunah phei chuan chhim lam unaute zak dêk a Direct Funding khel mek tawh. An hlawhtlin ruala UT first step rap mai tur an nih tawh a. Chutiang ang dodal ngam Mizo Party pakhatte pawh awm tawh lo. Kan zavaia lal bak ngaihtuah thleng pha tawh lo Mizote chenna Mizoramah hian, Chhim tawp atanga Hmar tawp thleng RAIL KAWNGPUI LIAN (Tuna Bairabi to Sairang single road ang lek ni lo.) hmanga in explore tir thei kan la ni lo. Chu mai bakah kan ram tha leh zau tak Environment a tihchhiat nasat turzia leh chumiin a nghawng tur, innghahna tak tak dang neih loh vanga shifting cultivation bansan thei lo Thingtlang kuthnathawktute future a nghawng dan turte hi, kan thlirpui tur a ni dawn lo’m ni?
Kan thlahtute leh kan hnam pasalthaten lu chhum ban chhum huam a, nunna tam tak senga an sah kuak sa kan ram zimte hi, thutlukna atthlak tak kan siam ni la la in, boral kumkhuana lamtluang a zawh tan dawn tih i hre theuh ang u.
Thutlukna vawi khat siam sual vangin, kum tam tak hnuah khawvelin ‘he ramah hian, tunhma chuan, Zofate ram niin, Mizote an lo cheng ve thin’ an la ti dawn.
I ram leh hnam a boral chuan, nang leh i thlahte pawh an ral vek dawn tih hre rawh.