– Jipson S. Hrangate, AFC Referee
-- Advertisement --
Khawvela football tournament ropui berte zinga mi Euro leh Copa America, thlakhat tal tawp nitin zantin maia mitkham/mutchhuak tur pawh dawn lova kan en/tuipui em em mai chu Grande Final ropui taka khelh zawh a lo ni ve ve ta a, tunah chuan kan reh deuh duak ta mai dawn chu a ni a, a khawharthlak angreng dawn hle mai a!
Kum 4 hnua lo lang leh chauh turte chu ui tak chungin kan lo thlahliam ta! Mahse, lungngai mai lo ila, khawvela infiamna chi hrang hrang infuankhawmna ropui em em Olympics Games chu kan hma lawk July 26 – August 11, 2024 chhung hian Paris khawpuiah a awm loeh dawn a, kan thlirho leh dawn nia.
Euro leh Copa America final-match chu kan unau Lamka khawpui leh a chhehvela chengte chuan an la urhsun angren ghle a; Sunday zanlai pelh dar 12:30-a final match Spain vs England hun tur nghakin in tin deuh thaw chuan chow, bbq, etc. te hlimtakin an siam a, Thawhtanni 15-07-2024 zingkara Copa America final match Argentina vs Colombia an ban thlen law law avangin an thawm pawh a na hle.
Euro aiin Copa America-in thawm a nei tha zawk mah niin a lang. School leh College-te chuan Euro leh Copa America avangin nimin kha holiday-ah an puang hial a ni!
Euro
Tun tum Euro chu mite lo rinlawk ang ngeiin Spain an champion ta nge nge e. An khel tha bawk a, an phu reng a ni. League point chhungin an khingpuite hneh vekin solid point (9) an hmu a, R-16 atanga final thleng an chak tluang par par a ni. Tun Euro-a an champion hi a vawi 4-na niin, khawvela Euro title la (win) ngun ber (1964, 2008, 2012, 2024) niin, world record an break chiang ta hle.
England-ho paw’n an tichhe lem lova, mahse, Spain defence wall an chhuthleng thei lo a ni ber e; an goal chance hloh ropui ber pahnihte chu Saka’n Spain territory chhunga ball a chelhlaia push-in ball pek beiseia chak taka lo tlan phei Waltera a pek loh kha a ni. Spain-ho chuan khatiang chance kha an hloh lo thung.
Spain-hoin trophy an dawm laia back-ground hla mawi tak lo lang “We are the champion” Queen, British Rock Band hmingthang takte hla hit em em chu vawiin thleng hian a la chuai lo. World Cup-ah leh Games & Sports lar tak taka champion-na hmunah play hlawh ber a la ni reng. Music column-ahte an chanchin kan la rawn tarlang thin dawn nia.
Euro lehpek chu kum 2028 khian England, Northern Ireland, Republic of Ireland, Scotland leh Wales ramahte khelh a ni ang. Anniho ramte hi football rawn intanna ramte pawh an ni hlawm a, hosting lam pawh an hnehsawh via uang. Chu mi huna intawng leh turin Euro 2024 chu bye-bye phawt mai ang aw!
Copa America
Copa America final match chu rin ang ngeiin a rough tiah tiah khawp mai! Colombian-te nawr kha a nat avangin Argentine-ho kha an hliam pheng phung hlawm a, an thiampuipa ber Messi pawh hliam avangin 2nd half atanga reiloteah a chawlh rih a ngaih tak avangin a thiante chu theihpalingkawhin an tang a; hun pekbelh extra time minute 112-a Martinez-a goal khat thun hmangin Copa America 2024 champion niin, an title kawl lai an humhim.
Argentina hian kum 2021 khan Copa America trophy la tawhin, kum 2022 World Cup-ah an champion leh a, tunah (2024)-ah Copa America title an hlawhchhuak leh a, mega sports event pathum laiah a zawna an champion mai hi world record an break chiang hle a ni.
WC 2026-ah pawh Argentina bawk hi champion leh turin beisei chhin ang.
Comment on Copa America
Tun tum Copa America final match-a extra time an khel tlat mai khan Copa America kalphung a tibuarchuar ngawt mai!
Quarter-final leh semi-final lamahte kha chuan minute 90 chhunga draw chu direct penalty shootout hmanga chak zawk zawn pawp a ni a, final-ah extra time minute 30 an pe leh lawi si a, tournament pakhata kalphung inpersan daih mai an kalpui kha CONMEBOL + CONCACAFF lam thil ruahman dan hi a mak angreng khawp mai. Hemi tak hi FIFA leh IFA Board-te’n ngunthluk takin rawn enfel se a tha ang.
Copa America lehpek kum 2028 khian Paraguay-in a thleng dawn a, South America khawmualpuiah Copa a kirleh dawn a ni.
Paraguay ram hi international football-ah an duai bik vak lo a, World Cup-ahte pawh round of 16 an kai ve zak zak thin. Paraguay rama Copa America-ah chuan India TV-te’n live telecast ngeiin inkhel an pechhuak tawh turah ngai ila, Copa America lehpeka inhmu leh turin lo dam zel teh u.