Khawvela mega sports lar ve ve Euro leh Copa America-te chuan a hmawrbawk an hnaih ta hle a, tan pawh a na tawh khawp mai.
Euro-ah chuan match thum chiah en tur kan nei ta – semi finals 2 & Grand Finale-te an ni ta mai.
Copa America ve thungah chuan 3rd place match nen inkhel vawi li kan la nei hram.
Euro-ah lut hmasa phawt ang
Tun tum Euro chu final-a inkhel tura kan duhte zawng Spain, Germany, Portugal, France leh Belgium-te round of 16 leh quarter-final-ah an rawn inkhing hmasa hlawm ta tlat mai a, kan tum/rin loh deuh team-te final-ah inkhel dawn ta.
Hei hi group league match vawithuma point an hmuh dan a zira thumvawr (draw) atanga rawn irhchhuak a nih miau si avangin R-16 (left-flank & right flank)-te matches chu a pumpelh theih ta loh a ni.
Eg: Final-a inbei tura kan duh berte:- Spain vs Germany & Spain vs France, Portugal vs Germany-te chu an intawng dawn ta lo tlat. Chuvangin champion tura kan rin lo ‘predict’ lawk daih mai ila: final-ah Spain vs Netherland an khel ang a, Spain-in straight win hmangin an hneh anga, an champion ang.
Spain hi penalties-ah lut ve lo se a tha ang; a chhan chu Spain hi khawvela ram (team) zinga penalty-shootout-a daulo ber(vanduaiber)-te zinga record a ni tlats! Penalty shootout-a daulo ber thina record dangte chu – England, Italy, Brazil, France leh Netherlands-te hi an ni.
Tun tum Euro-a Portugal team-in an hawnpui tak chu ‘They lived by penalty and died by penalty’ tih thupui a lo ni ve ta!
An keeper-in round of 16-ah khan penalty-a a chhanhim avangin quarter-final an lut thei hram a, tah chuan penalty hmang vekin an thi (out) leh thung a ni. Hetiang record hi World Cup 1990-ah khan Argentina hoin an lo tawng ve tawh a nih kha!
Portuguese-ho chak loh chhan
Euro kal meka Portugal-ho chak loh nachhan ber chu an team player-te zinga thikna (rivalry) awm vang a ni!
An team captain leh an thiampuipa ber ni bawk C. Ronaldo chu a teammate-hoin an pass tha duh lo tlat mai a, goal chance ropui tak a neih tur pawh an assist duh lo reng reng khan an team combination a tichhe vek a, goal chance tam tak an hloh (lost) phah ta a nih kha!
Anniho (Ronaldo teammate)-te lahin left & right angle zim atangin goal an thun thei bik der si lo, an aia skill nei hnem leh senior zawk Ronaldo-a’n awlsam taka centre penetration (a lai rawlh luh) hmanga goal thun mai tur an chawm tha duh lo tlat kha an thik (jealous) vang a ni!
Bruno Fernandes-a’n Ronaldo free-kick pet tur a lo pet khalh bur mai kha khawvela game-spirit mawi lo berah football fans zawng zawngte chuan an puang bur mai a ni.
Bruno hian Ronaldo hi Manchester United-a an khelh dun lai atang daih tawh khan a lo huhphurh (jealous) em em thin a, Ronaldo-a’n United a chhuahsan pawh khan Bruno hian lawm lutukin, “Tunah chuan United hi team tak tak kan ni ta, one man team ni tawh loin…” tiin a lo sawi el vel a nih kha! Ronaldo-a’n passing a dawn hnem thin kha a lo thik hle thin a ni!
Football team-a player-te inkara inthiktawnna (rivalry) awm thin hi team-te thanmawhbawk a ni chawk thin reng a ni.
Brazilian hoin kum 2002-a World Cup trophy an lak tum pawh khan khawvela forward line-up tha ber (Ronaldo, Rivaldo, Dennilson)-te an nei na chung pawhin a ruk takin an buai fo thin a nih kha!
Rivaldo khan Dennilson leh Ronaldo-te kha a thik avangin ball a pe (supply) duh ngai lo a, chance tamtak an hloh phah thin tih chu an midfielder thiam em em Ronaldinho khan a lo man chiang hle a, an pathum (R.R.D) tan ball remchang tak a siamsak thin avangin hnehna an chang thin chauh a ni!
Copa America lam ve thung
Copa America pawh quarter-final lamah Argentina vs Ecuador & Brazil vs Uruguay-te chu penalty shootout hmanga thelh an ngai a, penalty peta vannei zawk Argentina leh Uruguay-te’n semi-final lutin, champion lai Argentina hian final luh inchuh match pakhat zawkah beisei loh tak maiin north American team Canada an tum dawn a, last four match dangah Uruguay vs Colombia kan thlir dawn.
Ti chuan, kan predict chu hetiang a ni: final match-ah South American heavyweight pahnih Argentina leh Uruguay an intum ang a, champion tur chu Argentina ti mai ang aw!
COPA AMERICA leh EURO-ahte hian referee decision inpersan deuh hlek engemawzat a awm nual. Entirna’n, Euro-a Netherlands vs Austria inkhelh tuma Netherlands-in goal an thun laia lo chebuai ve chhen kha ‘interfering in the play offside’ hmangin goal an pawm lo a, amaherawhchu, Copa America-ah ve thung chuan Argentina vs Ecuador match-ah khan Ecuador forward Rodrique-a’n crossing ball mawi taka a thun lai khan a team-mate lo chebuai ve chhen chu offside lak a ni lo a, goal an pawm ta zawk.
Tin, Argentina vs Ecuador match-ah khan referee leh linesman-hoin jersey sen an ha vek a, Argentina keeper pawh a senin a inthuam bawk.
‘FIFA uniform identical law’ an tihah chuan hetiang hi awih a ni lo. Keeper chet theihna hmun zawng chu 18yd box chhung kha a ni mai a, referee chu a tul na naah a ni thung, mahse, attacking ball a lo kalin referee chu goal hnaiha a va awm loh theih loh chang chu a awm thin a, referee leh player uniform inang ha chu hriatsual palh a hlauhawm avangin referee & linesman- te hian player-ho nenajersey rawng inang an ha tur a ni lo.
EURO leh COPA AMERICA khaikhin ang
Euro-ah chuan minute 90 chhunga chak zawk an awm loh chuan extra-time 30mins (15+15) an belh leh a, chuta an la in draw tak cheu chuan penalty shootout hmanga chak zawk en a ni tawh thin. Tin, extra-time chhunga inhnehte chu ‘after extra-time’ (AET) tiin result an ziak thin.
Copa America lamah thung chuan minute 90 chhunga chak zawk an awm loh chuan direct penalty-shootout hmangin chak zawk an en thin.
European Championship-ah chuan semi-final match-a chak lo team pahnihte tan third place match kha a awm ve lo a; Copa America-ah chuan 3rd place match a awm thung.
EURO & COPA THUNAWI: Portugal-in chak (win) an duh lo! – Jipson S. Hrangate, AFC Referee
Get real time updates directly on you device, subscribe now.
Prev Post
Next Post