Europa League champion Atalanta

May 22, Nilaini zan khan Aviva Stadium, Dublin ah Europa League final khelh a ni a. Inkhel hmuhnawm takah Italian club Atalanta chuan 3-0 a hnehna changin an champion a, kum 61 zet hnuah trophy an chawi ve leh ta hlawl. Atalanta hian Bayer Leverkusen in tlawm nei lova treble champion nih an tumna an tih thlawnsak.
Final a intum Atalata leh Beyer Levekusen te hi season kal meka chetha dun tak an ni a, Europa League final an khel tur hi an phur dun viau bawk. Dublin khawpuiah an mahni tantute an zin tam dun hle a, Europa League final boruak an siam lian hle. Bayer Leverkusen hi German champion an nih vangin season tharah champions league an khel phak dawn a. Atalanta hi Italian Serie A-ah pangana an ni mek a, UCL khel thei dinhmunah an ding mek bawk. German champion Leverkusen hi season kal meka inelna hrang hrangah khelh 51 chhung zet tlawm nei lova kal tluang an nih vangin champion turin rin an kai hle a. Kum 60 chuang zet trophy chawi tawh lo Atalanta in an kawng an dalsak ta tlat thung.
Final ngaihven hlawh takah Italian club Atalanta in bul an tan tha viau a, minute 26 chhungin goal hnih an thun hman. Inkhel tan atanga minute 12-na lekah Atalanta hian fuh zetin Leverkusen an nawr tlang. Davide Zappacosta siam tha zet mai chu Ademola Lookman chuan top corner-ah chiang zetin a pet goal a, hmahruaina goal a thun. German champion lakah hma taka goal an thun hian Atalanta a fuih phur viau a, inrintawkna sang zawk nen final boruak sangah an inlan chhunzawm theih phah.
Xabi Alonso hnuaia hmasawn chak tak Bayer Leverkusen in an si phurh sut ngei tumin tan khawh mah se an hlawhtling thei lova, tlarhnung inrem fuh tak Atalanta an pal tlang hlei thei lo. Goal thun tumin tan khawh nasa hle mah se, goal chhuah zawkah an tang leh ta tlat thung. Atalanta tan hian goal hmahruai thuntu Ademola Lookman chuan 20 yard zeta hla atangin lei hrulah fuh zetin a pet goal a, an goal hnihna thunin, an hmahruaina a tizau. Lookman goal hnih thun hmangin Atalanta hian si hnih faia hmahruai chungin chawlhlawk an hmang.
Chawlhlawk hnu lamah German champion Leverkusen game a kang hret a, an khingpuite an nawr tawm sawt viau. Goal thun tumin tan khawh nasa viau mah se uiawm takin an hun tha an hloh a, an si phurh an sut thei lo. Leverkusen in an hun tha an chhawr tangkai thei loh laiin Italian club bawk an che fuh hmasa leh a, goal thunin an hmahruaina an tizau. Goal hnih thun tawh Lookman chuan G. Scamacca siamsak tha tak chu minute 75-naah fuh zetin a ti-goal a, an goal thumna thunin hattrick a siam. Lookman hattrick siam hmangin Atalata hian hnehna pawimawh tak an chang a, kum 1963-ah Coppa Italia-a an champion hnuin trophy lian an chawi leh ta nawlh a. Tun hi European competition a an champion hmasak ber tum a ni nghe nghe.
Atalanta lakah tlawmin, an tum tihlawhtling zo lo mah se Bayer Levekusen manager Xabi Alonso chuan a player te a chhuan thu a sawi a. German Cup-ah champion tumin tan an khawh zui leh ang.