Europa League khel tur Brighton

Nilai zana English Premier League inkhel awmchhunah Brighton & Hove Albion leh an mikhual Manchester City te chu 1-1 in an inhnehtawk. Champion thar lakah chak zo bik lo mah se Brighton hian Europa League khel phak tura an mamawh point an hlawhchhuak.
Paruknaa awm mek Brighton hian Amex Stadium-ah champion thar Manchester City an mikhual a. Europa League khel phak chiang nghal turin khelh 12 chhung ngawt chak zawn tawh City lakah tlawm pumpelh an mamawh. An muala fiahna hautak tak an hmachhawn tum hian Julio Enciso goal vannei hmangin tlawm an pumpelh hlauh a, an tum ram an thlen theih phah.
Amex Stadium-a lenglut City hian bul an tan tha viau a, hlauhawm an siam nghal zawt zawt. Inkhel tan tirh lamah Erling Haaland chuan hlauhawm a siam nghal a, Phil Phoden siamsak tha tak chu uiawm takin goal-ah a chantir thei lo. Hemi hnu lawk ian Brighton in free kick atangin goal an thun teuh hle a, goa bar an pet per dawp a, vanneihthlak takin City an him hlauh.
Goal an chhuah teuh viau hnuin City in goal thun theihna hun remchang an nei zui leh thuai a, Haaland chuan tha takin khalh tlang bawk mah se goal a thun thei leh tlat lo. Haaland hian hun tha hlah zawn mah se City in goal an thun ta thuai tho a, dan rual an ni lo. Minute 25-naah Haaland siamsak tha tak chu Phil Foden chuan awlsam takin a pet goal a, hmahruaina goal a thun.
Chak tura rinkai zawk City in goal thun hmasa mah se Brighton an hnual ngawt bik lova, huaisen takin an mikhualte an bei let a, chawlhlawk hmain goal an thun. Minute 38-naah buai deuh nuaih nuaih kar atangin Julio Enciso chuan a su goal a, mak leh vanneithlak takin an si phurh a, 1-1 a inhnehtawk chungin chawlhlawk an hmang.
Chawlhlawk hnu lamah team hnihte an innawr tawk leh viau a, goal khat ve ve thun mah se pawm a ni lo ve ve. Haaland goal thun chu VAR rawn a nih hnuin hnawl a ni a. Brighton tan Danny Welback goal thun chu offside vangin hnawl a ni bawk. Tichuan, hun tawp thlengin goal dang a luh belh thei tawh lova point khat ve ve an hmu ta a ni.
Champion thar City lakah point khat hlu tak an hmuh vangin Brighton hi paruknaah an insawh nghet a. Khelh khat khelh hmabak la nei mah se an hnuai chiaha awm Aston Villa tan lehpelh theih an ni tawh lova, Europa League an khel dawn tih a chiang zui nghal.
Europa League khel tur Brighton hi season kal mekah team chetha leh tlo ber pawl an ni a. An chet that chhoh em vangin an manager Graham Potter chu club hausa thar Chelsea in an lak sak. Potters chhuah hnuin an kal tluang lai a chawl det. Manager thar Roberto De Zerbi hnuaiah hmasawnna lam tluang an zawh leh thuai a. Parukna ni chungin season an khar dawn ta hial a ni.
Season tharah beisei angin bul tan tha vut lo mah se Manchester City an insiam tha thuai a. Khelh hmabak pakhat chauh an neih tawh laiin point 8 zetin an sang fal a. EPL-ah a zawnin vawi thum ngawt an champion nghe nghe a ni.