Europa semi-final

Europa semi-final
UEFA Champions League semi-final thawhkhatnaah khelh zawh a ni a, zanin hian Europa League leh Europa Conference League semi-final thawhkhatna khelh a ni ve thung dawng.
Europa League Semi-final-ah hian Italian club pahnih AS Roma leh Juventus an inlan dawn a. Final-ah Italian club ve ve inhmachhawn thei dinhmunah an ding. Jose Mourinho enkawl Roma hian German club Bayer Leverkusen an hma-chhawn dawn a. An mual Olimpico ah German team an mikhual ang.
Europa League-a champion ngun ber Sevilla chuan Italian club lian Juventus an hmachhawn dawn a. An ni pahnih inhmachhawn tur hi en a chakawm hle dawn. Sevilla hi an len luhna tur Allianz Stadium-ah tlawm an pumpelh thei a nih chuan final lut turin an dinhmun a tha zui hle ngei ang.
Europa League semi-final thawh khatnaah hi zanali dar 12:30-ah khelh tan a ni ang.
Zanlai dar 12:30-ah vek hian Europa Conference Semi-final khelh tan a ni dawn bawk a. Premier League club West Ham United chuan London Stadium-ah AZ Alkmaar an mikhual dawn a. Fiorentina in FC Basel an mikhual ve bawk ang.
2022-23 season hi European competition-ah Italian club te an chetha hlawm hle a, inelna lian pathum; Champions League, Europa League leh Europa Conference league-ahte semi-final lut zingah an tel vek. Champions League-ah Inter Milan emaw AC Milan emaw zawk zawkin final an lut ngei dawn a. UCL trophy hawn thei dinhmunah an ding. Europa League semi-final ah AS Roma leh Juventus an inlan dawn a. Final-ah an pahniha intum theihna hun tha an nei. Europa Conference League lamah pawh Fiorentina in semi-final an khel dawn bawk. Europe-a inelna lian pathumah Italian club ten trophy an la vek thei a nih chuan tui let hnu lama thil la thleng ngai lo, record thar a ni thei hial awm e!