Tun hnai kum sawm chhunga Kosovo leh Serbia inkara boruak tang nasa ber tukdaih nan North Atlantic Treaty Organization (NATO) chuan kar kalta khan peacekeeping sipai 700 lai Kosovo ah a tirlut a.
May 29 khan Serbs te North Kosovo-a lungawilohna lantir leh NATO kaihhruai Kosovo Force (Kfor) te inbeihna thlengin NATO sipai 30 leh Serbs 50 velin hliam an tuar a.
Khata tang khan Presidents of Serbia leh Kosovo te chu June 1 khan European Union (EU) nawrna avangin French leh German leaders te awm laiin an inhmu tawh a. Mahse, buaina tihreh nana resolution siam chu a la hla hle nia ngaih a ni.
-- Advertisement --
Buaina bulthut?
Kosovo leh Serbia te hi Balkans a awm ve ve niin Europe-a ram pakhat tun hmaa Republic of Yugoslavia huam chhunga awm ve ve thin an ni. Kosovo hi tun hma chuan Serbia province ni thinin kum 2008 khan Independence ram tia inchhalin mahni inrelbawl ram a nih pawmtu zingah US leh EU member te pawh an tel a.
Mahse, Serbia chuan Kosovo sovereignty hi pawm lo thungin a thunun miah lo chungin a pawm lo tawp mai a ni. Serbia chuan Kosovo chu history-ah pawimawhna thuk tak neiah ngaiin Serbian Empire hnuaiah Kosovo chu 12th century khan lutin chumi hnuah Serbian empire laimuah tangin Serb Orthodox Christian Biak In leh monastery tam tak te chu Kosovo-ah sak a ni zui an ti.
Serbia hian Kosovo chu 1389-a Battle of Kosovo-ah Ottoman Empire lakah a hloh a. Ottoman rorel laiin ethnic leh religious balance chu Kosovo-ah nasa taka inthlakin ethinic Albanian region leh Muslim tamna a ni zui a ni.
Kum zabi nga lai Ottoman thuhnuaia a awm hnuah Kosovo chu kum zabi 20 khan Second World War hnuah Serbia hnuaiah awmin province (autonomy nei) a awmin Yugoslav hnuaia republic paruk zinga pakhat a ni a. Hei hi Serbia chuan a chanpual reng anga a ngaih laiin ethnic Albanians te Kosovo population-a 90% vel chuan an duh lo thung a. Kum 1980 chho khan Kosovo Albanians te chuan Serbia atanga inlakhran an ngiat tan a, Kum 1989 khan Serbia autocratic leader Slobodan Milosevic chuan Serbian nationalism chawk nung nasain Kosovo autonomy chu a chhuhsak zui ta a ni.
Kum 1990 chho vel khan Kosovo Liberation Army (KLA), Kosovo Albanians te chuan Serbian lakah helna an kalpui ta a, Serbia chuan hmehmih tumin kum 1998 leh 1999 khan a bei nasa hle a, nunna chan 13,000 chuang awmin chung mite chu ethnic Albanians te an ni deuh ber. Mahse, kum 1999 khan NATO inrawlh tanin Serbs te hmun chu vansang atanga beiin Serbia chu Kosovo atanga inhnukdawk lo thei lovin a siam a ni. A hnuah NATO chuan peacekeeper 50,000 chuang chu UN Security Council (UNSC) Resolution 1244 hmanga dahin UN kaihhruaiin Kosovo a enkawl zui ta a ni.
Kum 2008 khan Kosovo chuan Serbia atanga independence a puang a. Serbia chuan Kosovo chet dan chu International Court of Justice (ICJ) ah a khing a, mahse ICJ chuan Kosovo chuan international law a kalh lo a ti thung.
Kum 2008 hnua thil thleng?
Tun dinhmunah Kosovo ah hian ethnic Serb minority 50,000 vel te Serbia hnaih Kosovo hmar lama chengte leh population atanga 5.3% vel te an awm a. Heng Kosovo Serbs te hian Kosovo state institution te chu an pawm lo va, hlawh leh hlawkna dangte pawh Serbia budget atanga dawng vek an ni a, tax te pawh Kosovo capital Printina emaw Serbian capital Belgrade hnenah emaw an chhung lut lo bawk.
Kosovo hmar lam region-ah hian kum 2008 khan buaina a chhuak a, a bul ber chu Serbs te leh Kosovo police-te chu Serbia-in Kosovo independent status a pawm loh avanga an inbeihna a ni. Mahse Kosovo chu Serbia-in remtihna a pek loh chuan UN member a ni thei bawk si lo, Serbia chuan Russia leh China te veto nei ramte nen inlaichinna an nei tha bawk si a ni.
Kum 2011 khan EU hmalakna leh US thlawpin Kosovo leh Serbia te chu an inkar an siam tha a nih chuan EU member ramah luhtir an ni ang tia thlem an ni a. Kum 2013 khan ram pahnihte chuan EU hmalaknain Brussels Agreement an siam zui a, chutah chuan Kosovo hmar lama Serbia thlawpa hmalakna te chu tihtawp vek tur a ni a, Kosovo a Serb te tamna municipality 10 ah Association of Serb Municipalities din tur tih a ni a, he inremna hi a zavaia kalpuiin a awm lo chungin inthlana Serbs te tel ve theiha siam hlawhtlin erawh a ni thung.
July 2022 khan northern region ah Kosovo in Serbian drivers te chu an rama an awm a nih chuan an vehicle-ah temporary-in Kosovo number plate hmang turin a ti a, chu chu Serbia pawhin an ram paltlang turte tana a phut tho a ni. Mahse, hmar lama ethnic Serbs te chuan an duh lo hle a, Serbia leh Kosovo inrina hmun hnihah lungawilohna lantirin kawngpui an danghcat zui a ni. Heng hmun te hi Kosovo khua leh tui ten Western Europe an pan theihna kawng awmchhun leh sumdawnna pawimawh a ni a. Nikum December khan Kosvo Serbs te chuan nasa zawka kawngpui dan chah an kalpui bakah Serbia in ramri hnaihah a sipai tam zawk a tir lut a tih avangin boruak a tang zui hle bawk.
Tun hnaia inbeihna chhan?
Kumin April thla khan municipal-ah mayor inthlan Kosovo-in a huaihawt a. Heng inthlante hi northern municipality a ethnic Serbs te tamnaah chuan boycott niin vote tla pawh 3% chauh a ni a, hei vang hian ethinic Albanian mayors te chuan municipal inthlanah chakna an chang a ni.
Kar kalta lawk khan Kosovo police-te thlawpnain ethnic Albanian mayors te chuan northern Kosovo a Serb-majority naah Serbs tena lungawilohna an lantir chungin office an luah tan bawk a. Kosovo-in Albanian member-te a dah avang hian buaina chhuah phahin US leh a thurualpui ramte chuan Printina an hauh phah a. May 29 khan NATO sipai leh Serb protester te chu an inbei reng a ni.
Resolution talk dinhmun?
Inbiakna neih hmangin technical leh political agreements 30 chuang siam Serbia leh Kosovo te chuan an siam tawh a. Kum 2015 tawp lam atang khan a hmaa inremna siam bak inremna siam thar a awm lo hle thung. Kum 2018 khan Kosovo President Thaci leh Serbian President Aleksandar Vucic te chuan ramri rin thata ram inthleng tawn an rawt chu EU-in hnawlin Europe hmun dangah harsatna a thlen zawk ang, a ti.
Kosovo-in Interpol member nih a dilna Serbia-in a dan tlat avangin Kosovo chuan Serbian bungrua chawkluhah chhiah 100% in a lak zui vangin inbiakna neih theih loh zui a ni a.
Kumin February thla khan Serbia leh Kosovo te chuan EU ruahmanna a thuphunga pawmin Belgrade chu international organisation leh UN thlegnin Kosovo candidature kalh zawngin chet a la tur a ni lo tih a ni. Kosovo thung chuan association of Serb-majority municipalities a din tur a ni tih a ni ve thung a. Ram pahnihte chuan an capital ve veah harsatna awm chingfel thin turin aiawh ruata dah an remti bawk a. Mahse, inremna tak tak siam dawnin Kosovo Prime Minister A;lbin Kurti chuan Serbian populist leader Vucic lakah a nem lutuk tiin an ram chhungah nationalist ten nasa taka an beih avangin a tlawlh zui a ni.
Serbia leh Russia inzawmna?
Kosovo leader ni mek leh Khawthlang ram te chuan Serbia in tun hma atanga Moscow nena inzawmna an neihthatna leh President Putin nena an inzawmna thaah ngaihthatlohna an nei bawk. Ukraine buai tirh phat pawh khan Kurti chuan Balkans ah pawh buaina chhuak thei tiin a sawi a. Kosovo in UN member nih a tumna dodalnaah Moscow chu pawimawh ber niin a veto a hmang thei tlat a. Hei bakah hian Serbia leh Kosovo buaina chinfel a nih chuan Russia in Serbia a thununa Balkans a pawimawhna a neih a chan mai dawn tia hlauhna a awm tih a ni bawk.
Ram pahnih president te hi June 1 khan an inhmu a, buaina tihreh a nih theih nan leh Serb tamna municipal a inthlanna chungchang an sawi dun phawt a ni.