Russian thunun Ukraine chhim lama tuikhuah chu tihchhiat niin nasa takin tui a sah a. Ukraine sipai leh Nato chuan tuikhuah chu Russia-in a tichhia an ti a, Russia-in Ukraine a puh ve thung.
Tuikhuah chhehvel leh a luanna lama mipuite chu hmun himah thiar chhuah an ni a, tuikhuah insah hian chhiatna nasa tak a thlen rin a ni.
-- Advertisement --
Khawiah nge tuikhuah a awm?
Kakhovka Hydroelectric Power Plant hi Ukraine-a Kherson region-a Nova Kakhovka khuaa awm niin Russian awp mek a ni.
Soviet hun laia khuah tawh kha niin Dnipro luia tuikhuah paruk zinga pakhat a ni a, Russia thunun awm chhun a ni bawk.
Thil thlen dan?
Tuikhuah kehchhia thlalak leh video thehdarh niin chungah chuan tui tam tak a luang liam lai leh Kherson a pan dul dul lai a lang a. Engtianga tuikhuah chu chhia nge tih hriat a ni lo va, satellite thlalak atang chuan tum khata chhe nghal buaih niin a lang lo thung.
June ni 2 khan tuikhuah chu a fel lo tih a lang tan a, mahse, June ni 6 khan a khuahnate chu a chim tan a ni.
Tuikhuah chhia avanga tuilian insiam hian mi 16,000 vel chu dinhmun derthawngah a dah nghal anga ngaih a ni a, Nova Kakhova building-te chu tuilianin a chim nasa hle tawh a. Hei bakah hian tuikhuah awmna atanga mel 50-a hlaa awm Kherson hmun hniam lama awmte pawh fimkhur thu hlaah inthiarchhuak tura tih an ni bawk.
Kherson region hotu Oleksandr Prokudin chuan Ukrainian TV hnenah thingtlang khua pariat chu tuilian hian a chimpil tawh niin a sawi a. Ukrainian hydro power dam operator UkrHydroEnerho te chuan an station chu tuilianin a tichhe vek tawh, an ti bawk.
Tuikhuahin beih a tawk em?
Tuikhuah chhiat chhan a la chiang thei lo a, Ukraine sipaite chuan Russia-in a hal chhiatah an ngai a. Chu chu thil ni thei niin, Moscow chuan tuikhuah chunga kawngpuite chu Ukrainian sipai tena Russian awp territory an luhna tur kawng pawimawh a nih vang a ni.
Mahse Kremlin thupuangtu Dmitry Peskov chuan Russia a inrawlh lo tiin Ukraine a dem a ni.
He tuikhuah hian pawimawhna thuk tak neiin mi tam takte tui thianghlim in tur petu a ni a, loneitu tam tak innghahna a ni a, tuikhuah chhia hian nghawng a nei thui hle dawn a ni.
Tuikhuah hian Zaporizhzhia a nuclear power station tan pawimawhna thuk tak a nei bawk a, cooling water petu a ni a, he power station hi Russia thunun mek a ni thung.