Europe-a pension kum tam ber tur Denmark

Europe-a pension kum tam ber tur Denmark
Denmark chu Europe khawmualpuia hna atanga mi chawltir upa ber ram an ni dawn a, an parliament-in kum 2040 atanga hman tan turin kum 70-a chawlhtirna tur a pawm.
Kum 2006 atang khan Denmark hian an rama mihringte dam rei zawng nena inmil tura insiam rem hret hretin kum nga dan zelah chawlh hun kum hi a ennawn thin a. Tunah hian kum 67-ah chawlin 2030-ah 68-ah a chho ang a, 2035 atang chuan kum 69-ah an chawl ang.
Kum 70-a chawlh hi December 31, 1970 hma lama piang zawng zawngte hman turin an ti.
Dan thar hi Ningani khan pawmin a duh vote 81 a tlak laiin duh lo 21 an awm.
Hetih lai hian nikum khan Social Democrat Prime Minister Mette Frederiksen-i chuan an kal dan hi inrawn chunga ennawna theih reng a ni tih a lo sawi tawh.
“Upat avanga chawlh hun hi a pung zel dawn tihna a ni ber lo,” a ti a, an party chuan ‘miin kum tam tak hna a thawk thei tawh lo tih an sawi thei reng’ tih a sawi.
Kum 47 mi, Tommas Jensen-a chuan dan siam thar leh chu tha a ti lo tih a sawi a, “Hna kan thawk a, kan thawk zel dawn tihna a ni a, kan thei reng dawn lo,” a ti.
Hna azirin thawh rei theih zawng a inang lo niin a sawi a, dawhkana thawk chi leh hna rum thawkte chawlh theih hun tihhran a tul niin a sawi.
Kar hmasa lamah pawh khan chawlh hun kum tihsan tur duh lohna hi an khawpui, Copenhagen-ah chuan sumdawng pawlten an lo lantir tawh.
Ningania vote thlak hma pawh khan sumdawng pawl chairman, Jesper Ettrup Rasmussen-a chuan ‘fair lo’ a tih thu a sawi.
“Denmark hi eibar dinhmun tha tak ram a ni a, chuti chungin EU-ah chuan chawl har ber kan ni tho,” a ti a. “Chawlh har hian miin upat lama nun a chen tur a chantir vek vek a ni,” a ti.
Europe-ah hian upat vanga hna atanga chawlh hun hi a inang lo nuaih a. Tun hnaiah sorkar tam tak chuan mi an dam rei avang leh sum indaih lohna tihnep nan an tisang nual.
Sweden-ah chuan miin pension hamthatna an dawn duh chuan kum 63 tal an tlin a ngai tih a kalpui.
Italy-ah chuan kum 67 a ni a, anni pawh hi Denmark ang thova dam rei zawng mila insiam rem thin niin kum 2026-ah an tihsan rin a ni.
UK-ah chuan October 6, 1954 leh April 5, 1960 inkara piangten kum 66-ah pension lawmman an la thei a. Hemi hnu lama piangte erawh chu kum tam zawk an nih a ngai ve thung.
France-ah kum 2023 khan chawlh hun hi kum 62 atanga 64-ah tihpunna dan siam a ni a. Mi tam takin lungawi lohna leh dodalna an lantir nghe nghe a ni.