Kawtthlerah thlawhna tê chi tlaah mi pahnih thi

Kawtthlerah thlawhna tê chi tlaah mi pahnih thi
San Diego-a mihring chenna veng kawtthlera Ningani tuka thlawhna tê chi tlaah mi pahnih an thi.
San Diego daia Murphy Canyon venga thlawhna tla hian chenna in pakhat a delh chhe vek a, in dang 10 pawh a tichhe nual.
Leia lo awm mi pariatin hliam tenau an tuar a, pakhat chu damdawi in kalpui ngai niin mi dangte erawh ngai lem lo an ni a. A bul hnaia cheng mi 100 vel erawh hmun dangah insasengtir rih an ni.
Thlawhna tla hi Cessna 550 niin Federal Aviation Administration chuan a sawi a, a khalhtu telin mi pariat atanga 10 vel phur thei a ni.
Thuneitute chuan tute nge thi tih leh a chuangte chu tute nge an la puang lo.
“Hmun tinah thlawhna hi a awm a ni mai,” tiin a hmuna awm, Assistant Fire Department Chief Dan Eddy chuan a sawi a. “Kan hriat thiam dan tur chuan eng emaw lian tak, chak takin khawi lam hawi zawng pawha theh darh ang hi a ni mai,” tiin a tlakna hmuna thil darhsarh dan a sawi.
A tirah Eddy hian ‘in tam tak a delh’ tih a sawi a, heng ina lo awmte hi tumah hliam na lutuk an awm loh a rinawm thu a sawi bawk.
Thlalak leh video thehdarhah chuan kawtthler dungah car kang bang leh chhe tak tak hmuh tur a awm nual.
A bul hnaia cheng, Christopher Moore-a chuan a nupui nen zing hma takah thil puak ring takin a tihhar thu Associated Press hnenah a sawi a. Tukverha an dah chuan thil khu an hmu a, an fate pahnih kaiin an tlanchhe zui niin a sawi.
Kawtthlerah car kang khu hluah hluah an hmu a, “Thil rapthlak tak a awm ngei tih a chiang a, himna zawn hmasak tulin kan hre zui a ni,” a ti.
Thlawhna hi San Diego hmar lam chuanhnuai km 10 vela hla, Montgomery Field-a thlawhna tumhmun pan nia hriat a ni.