Europe-a ram zawng zawng thlawh chhuak vek thei naupang ber

Rio Matsuoka, California, USA a cheng chuan kum 18 leh ni 101 a upa a nihin Europe khawmualpuia ram zawng zawng a tlawh chhuak vek a, hetiang ti thei naupang ber record a siam.
Rio hian a kum 18 tlin champha a lawm rualin hetiang ngaihtuahna hi a nei a, “He world record siam hi chutia tum lawk pawh ka ni lem lo. Ka chhungte hnenah high school ka zawh hunah Europe-a zin kual ka chak thu ka sawi a, eng eng emaw thlir kualna lamah khawvela ram zawng zawng tlawh chhuak vek thei naupang ber record an siam thu ka hre ta a, keipawhin Europe-a ram zawng zawng tlawh chhuak vek thei naupang ber record ka siam thei tih ka inhre ta a ni,” a ti.
Rio hian a bul tan nan ram vawt zet mai Iceland a tlawh hmasa ber a, a tawp khar nan ram lum nuam tak Malta a hmang ve leh thung. Europe khawthlang lama ram hrang hrang tlawh kual nan rel (train) a hmang deuh ber a, Europe khawchhak lama zin kualnan chuan bus a hmang nasa ve thung a, thlawhtheihna chu ram pahnih khat lek tlawh nan a hmang a ni.
A zin kual chhung zawng hian amah chauhin a kal a, mahse a zin kawngah thian thar tam tak a chhar thung. A ram tlawh hrang hrang zinga a mit la ber an zawhna chhangin, Rio chuan, “Thlang dawn ta ila chuan Sark ka thlang ang. Hei hi UK ram peng khat alawm, tiin min hnial maithei, mahse, UN-in ram pakhat angin a chhiar tlat a ni.
“Sark ram hi England leh France inkara thliarkar tê reuh tê tê inhlawm khawm a ni Channel Islands an tih zinga mi a ni a, mi 300 vel chenna ram a ni. Car lakluh an khap avangin chetvelnan tractor emaw bike emaw an hmang mai. A ram a mawiin he thliarkar hi an zanlam van boruak mawi zia hi hahip a sawi tham a ni bawk. A mi chengte an nelawm em em vek bawk. Khawpui lian tak tak te nena khaikhin chuan hahdam sawng sawng theihna hmun a ni. Duhthusam ram a ni ber mai,” a ti.