Inhauh laia sawi hauh loh tur

Inhauh laia sawi hauh loh tur
Nupa inhau ngai miah lo hi sawi tur an vang ngawt ang. Inhmangaih ber te pawhin inhauh chang an nei a, chu chu thil nihphung lo pawh a ni lo. Hetihlai hian relationship lama mithiam te chuan inhauh nikhuaa sawi loh tawp turn thil thenkhat a awm niin an sawi a, kan rawn tarlang e.
Inhauh laia kan tawngkam hman leh kan thil sawi, thenkhat chuan thinrim a belhchhah a, kan duh loh thleng thleng min kal tir thei. Chuvangin, inhauh laia sawi loh tur leh tawngkam hman loh tur ni a relationship lama mithiam te sawi te chu:
1. Inpuh tawn hi inhauhnaa thil common ber pawl a ni. ‘I thiam loh vek a ni,’ tiin thiam zawk nih kan inchuh ta thin a, kan inhauhna chhan ber ai pawhin thiam zawk nih inchuhna boruak chu a lo lian zawk thuai mai thin. Chuvangin, inpuhtawna, thiam zawk nih tuma inhnial ai chuan a tira in inhauhna chhan tak kha engtin nge in chinfel ang tih ngaihtuah zawk tur a ni.
2. “Hmanah pawh hetiang hian i ti tawh,” tiin thil kal tawh te kan sawi chhuak a. Hetiang hian boruak siamthat aiin a tichhe telh telh zawk. Hun kal tawha a lo tihsual tawh tuna sawi chhuah leh hian boruak a tichhe mai mai. Hmanah khan i ngaidam tawh a, tunah phawrh thar leh a tul tawh lo.
3. Thinrim lai chuan kan duh tak tak vang pawh ni chuang loin, ‘Inthen law law mai ang,” tih te pawh a awl thin khawp mai. I sawi tawh chuan lak let leh mai theih a ni tawh si lo. I thinrim laiin i tum loh takin i lo sawichhuak a nih chuan rang takin thupha chawi la, ngaihdam dil ang che. I kawppui chuan chuti maia awlsam chuan a ngaidam lo maithei che tih hre lawk bawk ang che.
4. “Engtihna mah i ni lo,” “I nep leh lutuk,” tih ang chi te hian kawppui te thin a khei zak tih hriat tur. Tu emaw mi nikhua lo deuh ni a kan ngaih teh nen tehkhin pawhin boruak a tichhe duh khawp mai.
5. “Ngawi reng ringawt lo khan eng emaw te sawi ve ta che,” tih te hi inhauh thinrim lai, kan kawppui te an tawng that duh vak loh lai ten sawi mai a awlsam hle. I thusawi a ngaithla tha lo emaw a hrechiang lo emaw, a ngaihven tha tawk lo emaw nia i hriat ten hetiang tawngkam hman mai hi a awl lehzual.