Europe-ah bomb hmangin thlawhna pasarih tihthaih
Europe-ah bomb hmangin thlawhna pasarih tihthaih
Europe khawmualpui hmun hrang hrangah passenger phur thlawhna pasarih chu bomb hmanga tihthaih an ni.
Ryanair thlawhna pahnih, Dublin atang leh Lisbon atanga thlawk chhuakte chu Rome-a an tum hnuah nasa taka dap a ni a, puak thei erawh hmuh a ni lo tih Fiumicino tumhmun chuan BBC an hrilh.
Dublin flight hi Italian air force-in a tum hma an an zui (escort) nghe nghe.
Poland, Spain leh Bulgaria-ah pawh thlawhna dap a ni bawk.
Vaunate hi a inzawm em tih hriat a la ni lo va, thuneitute chuan inzawmna a neih an la hre lo va, ram hrang hrangte hi inbepawpin a bawhzuinaah thawhho an tum.
Rome-ah chuan Fiumicino tumhmun chuan BBC hnenah police bomb disposal expert-ten uluk takin thlawhna an endik a, passenger leh thawktute an him vek tih an sawi.
Passenger, an bungrua leh thlawhna kil tin dap a ni a, engmah thil tha lo an hmu lo.
Spain chhim lam, Murcia-a tum, Ryanair thlawhna, Manchester atanga thlawk chhuak pawh dap a nih hnuah puak thei engmah an hmu lo tih Spanish thuneituten an sawi.
Warsaw pan thlawhna pahnih pawh tihthaih a ni a, pakhat hi London Heathrow atanga chhuak a ni.
Heathrow atanga chhuak hi Polish khawpuia an tumhmun lian ber, Chopin-a tum tur a ni a; mahse, a te zawk, Modlin tumhmunah tumtir a ni a, rei vak lo tumhmun khar phah a ni.
Scandinavian Airlines thlawhna, Copenhagen atanga Warsaw-Chopin pan erawh ruahman anga tumtir a ni.
Thawhlehni tlaiah khan Bulgarian Transport Minister Georgi Peev-a pawhin an khawpui, Sofia pana thlawk pahnih chu bomb hmanga tihthaih a ni tih a sawi.
Sorkar hnuaia mi, Bulgarian News Agency (BTA) chuan Italy hmar lama Bergamo leh Ireland khawpui, Dublin atanga thlawk an ni tih a sawi a. Sofia-ah tha taka tumin thlawhna endiknaah engmah puak thei an hmu lo tih Peev-a chuan a sawi.
Bulgaria-a border police chuan thuchhuah an siamah Thawhlehni chawhma dar 10:35 (India-a chawhnu dar 02:05)-a email an dawnah ‘Bergamo atanga thlawk kir thlawhnaah puak thei a awm’ tih an dawn thu an sawi a. Email-ah hian Dublin atanga thlawhna thleng turah pawh puak thei a awm tih an tar lang bawk niin an sawi.
Thawhtanniah khan London Luton atanga Budapest pana Wizz Air thlawhna thlawk chu bomb hmanga tihthaih a nih hnuah Hungarian indo thlawhnain a lo escort tawh bawk.
Wizz Air hian engmah an hmu zui lo tih an sawi.